Nimin khan Aizawl Falkland venga Folkland Park-a cafeteria-ah kangmei a chhuak a, kang thelhtuten tui chawi tur an neih mai loh avangin hun rei vak lo chhung thelh a khailak.
Folkland Park enkawltuten The Zozam Times an hrilh danin, kangmei chhuah hun hi chawhma dar 11:30 vel kha a ni a, kangmei hi cafeteria chhunga choka, alu kanna atanga chhuak nia hriat a ni.
Kangmei chhuah lai hian thawktute chu ground floor-ah meeting an nei a, kangmei a chhuak tih an hriat hian choka hi a lo kang nasa tawh hle a. A thelhtu zinga mi hliam tenau tuar mi pahnih an awm a ni.
Kangmei chhuahna hmun tlawhtu, The Zozam Times thudawn danin Fire & Emergency department chuan kangmei chhuah thu hi chawhma dar 11:50-ah an dawng a, kang thelhtute chu dar 12:10 bawr velah Folkland Park thleng nghalin, minute 20 bawr velah kangmei chhuak hi an thelh mit thei.
Kang an thelh lai hian an motor kena tui an paite an hmang zo a, an bul hnai fire hydrant, |huampuiah tui chawi turin kal nghal mah se tanky-ah hian tui chawi tur mumal a lo awm lo a, hei avang hian hun rei vak lo chhung chu kang nasa zual an thelh mih hnuah an chawlh lailawk a ngaih phah hial a ni.
Kangmei chhuahna hmuna The Zozam Times a thlen pawh hian cafeteria chhung hmun thenkhatah mei alh hmuh tur a la awm a. Kang thelhtu lamin tui an dap kual hnuah chungte chu thelh mih leh a ni.