Israel leh Palestinian inbeihna kal zelah Thawhlehni zan khan thi leh hliam an awm belh a. Kum 2014 hnu lamah boruak atanga inkahna an neih nasat ber tum a ni.
Nimin tuk khan Israel lamin Gaza chu rocket 100 chuang hmangin an kap a. Islam firfiak pawl leh Palestinian hel hovin Tel Aviv leh Beersheba an kap let bawk.
Buaina chhuakah hian mi 40-in nunna an chân tawh a, Palestinian mi 35 leh Israel mi panga an ni.
Thi zingah hian naupang 12 an tel a, mi 220 dawnin hliam an tuar. Israel sipaite chuan firfiak pawl mi 15 an tihhlum thu an sawi.
Muslim leh Juda sakhua vuantute hmun thianghlim awmna, Jerusalem-ah tun hnaia Israel police-te leh Palestinian mite intihbuaina chuan reh lam aiin a punlun zawnga a kal zel avangin Hamas firfiak pawlin Israel hi an kap ta a ni.
Nimin tuka Israel-in an rocket hmangin Gaza-a mihring chenna inchhawng 13 dawna sang an kah avangin a tlu chhia a, a dang pakhat pawh a chhe hneh hle.
Israel chuan an indo thlawhnain Hamas intelligence awmna beiin an hruaitu eng emaw zat an thih thu an puang a. Hamas pisa leh rocket an kah chhuahna hmun thenkhat an chhu chhia niin an tar lang bawk.
Gaza khawpuia mihring chenna building pahnih an kahna phuba lakna atan Hamas-ten Beersheba leh Tel Aviv chu rocket 210 chuang hmangin an kap let nghal niin an puang.
Hamas hian Gaza-a mihring chenna hmun beih a nih chuan na taka an chhan let tur thu an lo puang lawk tawh.
Hel pawlin Israel sumdawnna khawpui ber, Tel Aviv an beih tak avang hian Israel lam hian Islamist Hamas pawl lakah hmalakna tur thar lian tak an hmachhawn dawn niin a lang.
Israel-in Lod khawpuiah emergency a puang a. He hmunah hian Israeli Arab hovin buaina an chawkchhuak a, mi 12 dawnin hliam an tuar niin an khawpui mayor-in a sawi.
Israel sipaite leh Palestinian firfiakte Gaza-a an inbeihna kal zelah Israel ram chhunga hnam tlem zawk, Arab hovin Palestinian thlavang hauhna atan buaina leh nawrhna an huaihawt ve mek bawk.