Aizawl : Lawngtlai district-a sorkar department hrang hrangte chu Lawngtlai Bawrhsap David Lalthantluanga hovin nimin khan an ṭhukhawm a. Article 275(1) kaltlanga district chhung hmasawnna hna- thawh tur ruahman, district plan 2023-24 siam chungchang an sawiho.
Bawrhsap chuan department hrang hrangin scheme awm sa aṭanga an thawh theih baka district leh mipuite hmasawnna tur hna thawh nan hman a nih theih nan Article 275(1) hnuaia District Plan ruahmanna chu an siam thiam a ṭul thu a sawi a. Department-te chu District Plan atan ruahmanna ṭha leh felfai, a taka hlawhtlinpui ngei tur siam turin a chah.
Lawngtlai DRDO Project Director Marilyn Rualzakhumtha- ngi’n kum hmasa lama Article 275(1) hnuaia Lawngtlai District-in sum a dawn tawh dan sawiin, District Plan 2023-24 chungchanga hriat tur pawimawhte a sawifiah bawk.
Sorkar thuchhuahin a tarlan danin India ram Danpui (Constitution) Article 275(1) beh chhana ram chhunga tribal mipuite tana hmasawnna tur hnathawhna (tribal development programme) sorkar laipuia Ministry of Tribal Affairs hnuaia ruahmanah kum 2021-22 sorkar kum chhung khan Lawngtlai District chuan Rs nuai 217 a dawng a. Kum 2022-23 atan Rs nuai 338 ruahmanna thehluh a ni.
Lawngtlai district aṭanga District Plan atan hmasawnna kawng hrang hrang education, health, water supply, agriculture & allied, commerce & industries, administrative structure, skill development, infrastructure development leh sports lam atan te ruahmanna siam ṭhin niin, engemawzat chu sorkar laipui aṭanga pawmpuina hmuh leh hnathawh tawh a ni a. Project pawm tawh, a tahtawla sum dawn beiseina engemawzat a awm tih sorkar thuchhuah chuan a tarlang bawk.