Manipur-a tribal MLA 10, hnam hrang hranga mite chua ‘tribal tan state hran’ an duh thu an sawi.
“Kan mite hi Manipur hnuaiah chuan an awm reng thei dawn lo,” tiin MLA-te hian Zirtawpni khan thuchhuah an siam.
MLA-te hi Haokholet Kipgen (Saitu), Ngursanglur Sanate (Tipaimukh), Kimneo Haokip Hangshing (Saikul), Letpao Haokip (Tengnoupal), LM Khaute (Churachandpur), Letzamang Haokip (Henglep), Chinluthang (Singngat), Paolienlal Haokip (Saikot), Nemcha Kipgen (Kangpokpi) leh Vungjagin Valte (Thanlon) te an ni.
Tharum thawhna chu tlangrama cheng tribal-te beih tumna a nih thu leh hei hian Manipur inthen darhna a thlen thu an sawi.
Manipur-a mihring tam zawk, Meitei-te chuan tribal-te lakah tharum an thawh nasa niin an sawi a. Manipur sorkar chuan tharum thawhna chu ‘a thlawp’ niin an sawi bawk.
“Manipur hian min humhim zo lo va, Indian danpui hnuaiah leh muanawm taka kan chen theih nan inawpna hran kan duh a ni,” tiin tribal MLA-te hian an sawi.
Ningani khan Manipur sorkar chuan state pumah dan leh thupek kenkawh a mumal tawh a, ‘tharum thawhna tul lo tak’ thleng theite chu ven vek a ni tawh tih a sawi.
Sorkar thupuangtu, Th Basanta Kumar Singh chuan ‘state pumah boruak thunun vek tawh a ni’ tih a sawi.
Thupuangtu hian muanna a awm zel theih nan state sorkar chuan hma la zelin inremna pumhlum a siam theih ngei a inring tlat tih a sawi bawk.
Kar hmasaa buaina nasa tak chhuakah khan mi 30 man tawh an ni a, mi dang pawh chhui zui mek an la ni.
Buaina chhuaka thi chu mi 68 an tling tawh a, hliam tuar mi 236 an awm bawk a. Thil hal thubuai 1,794 ziah luh a ni bawk.
Manipur-a buaina hi Meitei-ten Scheduled Tribe-a telh ve an phuta leh a awm saten an duh loh avanga chhuak a ni.