- Reuben Lalnunthara Hnamte
Nu te ni(Mother’s Day) hi Salvation army chauhin kan hmang lo va, America leh hmun dang dangahte urhsun takin hman thin a ni a. He hunah hian Nu te chawimawina nei a, thilpek te pe a urhsun taka hman thin a ni a. America ramah phei chuan sorkarin chawlh a puang hial thin a ni. Khawvel mihring hi Nu atanga lo piang chhuak vek kan ni a, Pathian fap Isua meuh pawh Nu atanga lo piang chhuak tho a ni a, hei hian Nu pawimawh zia leh hlut zia a tilang chiang hle mai. Naute in a taha a lam hmasak ber chu nu a ni a, puitling tawh pawhin manganna an han tawh tak tak chuan Nu hi an lam ruai chawk. Naupangte tan chuan nu hi thlamuanna leh hahchawlhna an ni a, nu hmangaihna hre miah lo naupang chu an chhungrilah baihvai rukna leh an nunah kim lo riau a awm thin. Pa ber pawh khawi lo avah chhuah a in a hawn a, a fate hnena a sawi hmasak thin chu “ khawnge I nu” tih hi a ni fo mai.
Nula tlangval inngai zawngte, nupa te meuh pawh inhmangaih taka langte pawh engemaw avanga inthen ni emaw, an inhmangaihna chuan kin ni a nei thin. Nu hmangaihna erawh chuaini nei hauh lo hmangaihna a ni. E.H Chaplin chuan “ Nu hmangaihna thiltihtheihzia hi eng tawng mah hian a hrilhfiah zo lo ve “ a lo ti hial. Chhûngkua tinuamtu, timawitu, tizahawmtu leh uap lumtu chu nu hi a ni a. Inlêng leh mikhual hmaa chhûngkaw dârthlalang târtu a ni. Nu hlutna hi hmuh theih khawvêl thilah a hen zo pakhat mah a awm lo. Napoleon-an, “Nu tel lo chuan khawvêl hi thlalêr ram ro, tui awm lohna ang a ni,” a lo ti hial a ni. Nu chu chhungkaw hlimthla an ni a, zirtirtu ropui an ni bawk. Chhungkaw hlimna leh fa te tana doctor tidamtu kut chu nu kut hi a ni. Fa te leh pasalte tana hahdamna hmun an ni a, nu fel tak chuan chhungkua a tihlimin thlamuanna thlentu a ni a, an va han pawimawh tak em!
Chutiang khawpa nu chu chhungkaw tan leh fa te tana an pawimawh em em laiin, an mawhphurhna hre miah lo nu thenkhatin an fa te leh an pasalte kalsana an han uire ta mai thin hi chu a rapthlak em em a ni. Chhungkaw kehchhiatna leh chhungkaw tana tuarna rapthlak an thlen thin. Chutiang bawkin mipa in mi nu a ni tih hrerenga an han ngaizawnga an han uirepui duh thin hi chu an thiltih rapthlak zia leh nghawng pawi zia hi hria se chuan an ti duh angem? Nge hrereng chungin an pawisa miah lo zawk? Mi tluang leh mi vannei tak an awm thei hian ka ring lo, mahni chhungkua tichhia a, mi chhungkaw tana tawrhna thlen tu hi mi awhawm tak chu an ni hauh lo a ni. Nula ten nau an han pai a, hre chiang miah lo va an han ti tla thin te hi an thiltih rapthlak zia hi hria se chuan an ti duh angem? A titla tu leh a tih tirtu kha thuhmun reng a ni a, chuvangin mipa te pawhin an nupuiote lakah chauh fa nei se la; hmeichhia pawhin an pasalte lakah chauh fa neih hi a him ber a ni. Nau tihtlakte hi Pathian pawikhawihna lian tak a ni tih hriat thar a pawimawh hle.
Kan sawi tawh angina Khawvel chhandamtu Lal Isua lo pianna pawh Nu a ni a, khawvel mi ropui leh thiltithei tak takte lo pianchhuahna pawh Nu bawk a ni. Nu hi khawvel bul lo intanna, hringnun intanna a ni a, an pawimawhin an va hlu em! Abraham Lincolna chuan “Mi tupawhin Pathian ngaihsak mi nu a neih chuan a rethei lo vang “ a lo ti a. Nepoleona chuan “ Nu ber taihmakna inah chuan pasal bengtla lo deuh pawh awm mah sela,fa ropui tak tak an nei thei a. Nu sual leh bengtla lo enkawlna atang erawh chuan mi ropui an chhuak ngai lo “ a lo ti bawk. Nu ni tawh te pawhin chhungkaw tana nu tha ni turin I in tuaithar ila, nula te pawhin chhungkaw tana nu ni turin inbuatsaih bawk ang u. Doctor pakhat pawhin “ ka dam loh chuan ka nu in damdawi min chawh thin “ a ti. DL.Moodya chuan “Ka hlawhtlinna thuruk chu nu tha ka nei hi a ni,” a ti bawk.
I nu chu alo upa deuh tawh a “I thing, I mawl” te I ti ngai em? Tuna I dinhmun a din tirtu che kha I nu a ni a sin, a upat poh leh duat la ngaihsak rawh. I kawr hlui ringawt hak tir lola, I pheikhawk hlui ringawt bun tir hek suh. A ei duh zawng siam sak la, a hlimna tur ngaihtuah rawh. Vawiina Pangpar kan pek ringawt hi kan chawimawina tur ani lo. I nu chawimawi I duh takzet chuan I nungchang in chawimawi ang che. Kan tun dinhmun theuh min thlentirtu hi midang ni lovin Nu te an ni. Kan Nu te I chawimawi theuh ila; an hlutzia leh pawimawh zia hi I hre thar leh ang u.Nu nei tawh lo te pawhin lungchhiat nan hmang mai lo ila, nu tha ni turin tan ila ila; Nu la nei te pawhin “ ka nu ka hmangaih che” tiin thinlung takin I hmangaih let ve ang u.
Mothers’ Day chiabai ule.