National Florence Awardee 2020-2021 dawngtu – C. Dengthangpui, Health Supervisor (Rtd) – 2020; Vanlalthuami, Health Worker – 2020 leh Vanlalrovi, GNM staff nurse – 2021 te chawimawina hun nimin khan Health Minister Dr. R. Lalthangliana hovin a pisa-ah hman a ni.
Health minister chuan Mizo zinga National Florence Nightingale Award dawngte chawimawina hun, International Nurses Day-a an hmang thei chu a lawmawm a tih thu leh inhmeh a tih thu a sawi a. Mizo hmeichhe zingah he chawimawina dawng an awm thin chu ropui a tih thu sawiin a dawngtute chu mi dang tana inpe leh malsawmna ni chhunzawm zel turin a chah.
Nurse hnathawk mekte leh pension tawh te, medical lama thawkte chu an hna pawimawhzia hriaa damlo leh chan chhe zawkte hmangaihna, duhsakna leh khawngaihnha tak tak nena enkawl zel turin health minister chuan a chah a. “Damlo enkawl chu hahthlakin hrehawm chang awm mah se tawngkam tha nen damlote chhawn zel ang che u,” a ti bawk.
Nurse hnathawk thate chawimawina, National Florence Nightingale Award hi kum 1973 atanga sem tan a ni a, Mizorama nurse 14-ten an dawng tawh a ni.