Colorado thuneitute chuan kartawpah khan mi pakhatin piancham lawmnaa tel mi paruk silaiin a kap hlum a, birthday party-ah hian tel tura an sawm ve loh vang niin an sawi.
Police chuan kum 28 mi, Teodoro Macias chuan a bialnu, kum 28 mi tho, Sandra Ibarra-Perez chu kap hlumin a chhungte dang panga pawh a kap hlum leh a, amah a inkap zui niin an sawi.
He beihna hi Canterbury Mobile Home Park, Colorado Springs-a Inrirnni zan zanlai pelh, Pathianni zing lama thleng kha a ni.
Piancham lawmnaah hian chhungkaw thum sawm niin chhungkaw hniha mite an thi.
Colorado khawpui hmar lam laili, Boulder-a eichawp zawrhna dawra inpawng kahna thlenga mi 11 an thih hnu thla hnih pawh tling lova thleng a ni.
Police-te chuan Colorado Springs-a mi kaltu hi a hma chawlhkarah a mi kahte chhungkua nen hian intihbuai deuhna an nei a, an fanu bialpa ni tho mah se an chungah a thinrim hle niin an sawi.
“A tih chhan bul ber hi chhungkaw inhuatna thil a ni,” tiin Colorado Springs Police Chief Vince Niski chuan Thawhlehni khan thuthar lakhawmtute a kawmnaah a sawi.
“Macias-a hi an chhungkaw intihhlimnaah hian sawm loh a ni zui a, silai nen a chhang let ta a ni ber,” a ti.
Silai hmet puaktu hian a theihna leh kum khat chuang a lo kawp tawh laka a bialna tihlan a tumna a ni a. A hmain pawikhawihna dang a la nei ngai lo niin a sawi a. A silai, semi-automatic pistol erawh kawl phalna a nei lo niin an sawi.
A kah hma lawk hian tleirawl pathum chu an thenawma mamawh lamin an chhuak a, an haw leh chuan hetiang thil hi an hmu ta mai niin police Lt Joe Frabbiele chuan a sawi.
Naupang pathum, kum hnih, kum nga leh kum 11 miten inkahna thlen lai hi an hmu a, anmahni chu an na lo hlauh niin police chuan an sawi a, silaimu kah ruahna kartut 17 an chhar.