China-ah hian English khua te, Alpine tlingtlang khua te leh Eiffel Tower thlengin hmun tur a awm. Ram danga in sak ropui danglam tak takte chu lachhawnga sak an ching a; mahse, sorkar chuan heng zawng zawng hi a thiahtir vek dawn a, tualchhung duan vawrh lar a tum.
Sorkarin thuchhuah a siamah chuan, “Vantlang thilah mi thiltih ruk, entawn leh a ang lakchhawn chu khap tlat a ni,” a ti.
Thuchhuahah hian heng in sak ropui tak takte hian mi khawpui culture a pho chhuak a, ram dang mi thil lak luh chin tawk nei turin a ti.
Inkaihhruaina tharah hian skyscraper sak tharte pawh thiah then tur a awm nual dawn a, metre 500 aia sang phal a ni tawh dawn lo.
Global Times-in a tar lan dan chuan ram dang in sak entawna sak, thil lem tak tak chu third leh fourth-tier Chinese khawpuiah hmuh tur a tam.
Sorkarin ram dang thil entawna thil sak tihtawp a duh chhan hi chiang takin a tar lang lo va; mahse, khawpui endikna kawngah harsatna a siam niin a tar lang thung.
Thu hi April 27 daih tawha chhuah kha niin tun karah thehdarh chauh a ni a. Khelmual, exhibition centre, museum leh theatre te chu vantlang hmun zinga mi tih entawna sak loh tur zingah a tel.
“Khawpuia thil sak hi khawpui hmel lanna leh a chhunga mite rilru tar lan a ni a, culture pho lanna a ni,” tiin thuchhuahah hian tar lan a ni.
Hun thar, new era-ah chuan tual chhuak in sak thiamna (architecture) chu tharthawh lehzuala Chinese nihphung pho lar tum a nih thu tar lan a ni bawk.
Sorkar thuchhuah hi Chinese social media-ah chuan lawm a hlawh hle nghe nghe.