Court of Special Judge (Prevention of Corruption Act) chuan Rs. nuai 29 tihchingpen thubuaiah National Rural Health Mission director hlui leh health services-a EE-a awm thinte chu thiam loh a chantir.
Aizawl District Court-a Special Judge (Prevention of Corruption) Dr. HTC Lalrinchhana chuan nimin khan court thuremna a puang a, thiam loh chantir mi pahnihte chu NRHM mission dicrector hlui, Dr N Palai leh health services-a EE-a awm thin, Lalsangliana Chhakchhuak te an ni a, an pahnih hian Central Jail-ah dah luh nghal a ni a, May 15, 2023-ah hremna puan a ni ang.
Court thuremnaa tar lan a nih danin he thubuai hi Ministry of Health & Family Welfare, Govt of India, NRHM III Division-ten Aizawl Civil Hospital tihchangtlunna tur sum Rs. vaibelchhe 10 kum 2007-a Mizoram State Health Society an rawn pek tihchingpenna thubuai a ni a. Thubuai hi Deputy Secretary, Vigilance Department, Government of Mizoramin kum 2012 khan CBI hnenah a pu lut a, thubuai thehluhnaah chuan Rs. vaibelchhe 5.74 zet hman khawloh anga tar lan a ni.
Thubuai chhuitu, CBI hian thil pathum bik thlur bingin Aizawl Civil Hospital compound hung thatna tur pawisa Rs 19,78,000 chu T. Ruata r/o Republic Veng Aizawl hmingin pek a ni a, pawisa an pek, T. Ruata hi hmuh zawh a nih loh bakah T. Ruata hminga contract hna pek leh sorkar sumpai tihchingpennaah hian Dr. N. Palai hi ama tan emaw, mi tu emaw duhsak bikna neiin sorkar sum tichingpena puhna hi CBI hian an finfiahah ngaih a ni.
Vulmawi Art Works neitu, Lalbuta hmingin cash memo siamin Spiral Binding machine & VHSL Folder lei nan Rs 2,56,350 hmang ral anga bill siam a ni a, hemi chungchangah hian Dr. N. Palai hian Lalbuta hnen atangin cash memo la dah khah loh a lak thin thu hriat chhuah a ni a, bungrua an lei anga sawi pawh hi Vulmawi Art Works hian an neih ngai loh leh health department hnenah phei chuan an hralh hauh lo thu chu CBI hian an finfiah a, hetah pawh hian Dr. N. Palai hian sum a tichingpen ngeia ngaih a ni.
Warehouse sakna tura architectural drawing siamna tur sum Rs 7,12,469 chu Anthony Zothansanga hminga sum pek chhuah a ni a, he sum hi thubuai neitu , Lalsangliana Chhakchhuak tan a chenna ina pe ngeia puh a ni a. He sum hi Lalsangliana Chhakchhuak hian dawng ngei a ni tih CBI lam hian an finfiah a ni.
Aizawl Civil Hospital compound hung thatna tur pawisa pek chhuah te, spiral binding machine & VHSL Folder leina nia sawi leh warehouse sakna tura architectural drawing siamnaa pawisa chingpen zawng zawng chhuichhuah zat hi a vaiin Rs 29,48,819 a ni.
Court of Special Judge chuan Dr. N. Palai leh Lalsangliana Chhakchhuak te hi section 471/477A IPC leh 13 (2) r/w 13 (1) (c) (d) of PC Act, 1988 r/w 120B IPC hnuaiah thiam loh a chantir a ni.