Aizawl: Agartala Mizo Welfare Association (AMWA) hruaitute ngenna angin Transport Minister TJ Lalnuntluanga chuan Tripura Transport Minister Sushanta Chowdhury chu Agartala-a a pisa-ah hmuin June, 2023 atanga tawp mai tur nia hriat, Aizawl leh Agartala inkar thlawhna service chhunzawm zel dan tur a sawipui.
Zirtawpnia state pahnih transport minister-te inkawmnaah hian Aizawl to Agartala flight service chhunzawm zel a nih theih nana hmalak tul te, state pahnihten theihtawp chhuaha bawhzui tlan tha an tih thu leh civil aviation ministry leh thlawhna company thuneitute hnenah thla leh atanga Aizawl to Agartala inkar thlawhna service titawp lo tura ngenna siam nise tiin an sawi dun a ni.
AMWA hruaitute chuan sorkar thil pawimawh avanga Agartala, Tripura-a zin, Transport Minister T.J. Lalnuntluanga chu hmuin Aizawl leh Agartala inkar thlawhna service tihtawp a nih loh nana hmalakpui tura an lo ngen bawhzuiin Minister hian Chowdhury hi a kawm a ni.