Karnataka police chief Praveen Sood chu Central Bureau of Investigation (CBI) director atan thlan a ni a. May 25-a a hun hmang zo tur, Subodh Kumar Jaiswal a thlak ang.
Sood-a hi March thla khan Karnataka Congress chief DK Shivakumar-a’n an state-a BJP sorkar humtu nia a puh avangin chanchin nei hat tawh a ni a. Shivakumar hian Director General of Police hian Congress hruaitute laka thubuai a siamsak avangin man ni se a duh thu a sawi a ni.
Inrinni khan Prime Minister Narendra Modi, Chief Justice of India DY Chandrachud leh Lok Sabha-a opposition leader Adhir Ranjan Chowdhury te awmna committee chuan CBI chief thar atan hian an pawm a ni.
Sood-a hi 1986-batch Indian Police Service (IPS) officer Karnataka cadre niin Jaiswal-a dawtah chuan IPS officer senior ber a ni mek.
Department of Personnel & Training chuan Sood-a ruatna pawmpui a nih thu hriattirna a chhuahah chuan a pension hma, kum hnih chhung he nihna hi a chelh dawn a ni.
CBI director hi prime minister, Chief Justice of India leh Lok Sabha-a eptu hruaitu telna committee-in an thlan thin niin kum hnih atan zel a ni a, kum nga thleng an hun pawh sei theih a ni bawk.