Congress chuan Pathianni tlai khan an MLA thar turte ko khawmin chief minister tur an sawiho dawn.
Thutkhawm hi Karnataka Congress chief DK Shivakumar chuan Bengaluru-a Shangri-La Hotel-ah tlai dar 6:00-ah koh a nih thu a sawi a, Congress Legislative Party thukhawm hian Congress president hnenah chief minister tifel tura ti turin thu an titluk rin a ni.
He chanchin ziah lai hian engmah hriat tur a la awm lo va; mahse, chief minister tur tifel nghal lovin MLA tin ngaihdan erawh lak a ni dawn nia sawi a ni.
Congress general secretary pathum – Sushil Kumar Shinde, Deepak Babaria leh Jitendra Singh Alwar te chu Karnataka CLP thutkhawm ho tura tih an ni bawk.
Shivakumar leh chief minister hlui, term liam tur chiaha opposition leader, Siddaramaiah te chu chanvo sang ber chang tura ri ring tak an ni mek.
Shivakumar hi a chhungte nen, a unaupa, Bangalore Rural bialtu Congress MP DK Suresh te nen khawpui atanga km120-a hla, temple-ah Pathianni kha chuan hun an hmang daih.
“Mi thenkhatin Siddaramaiah nena inmil lo ang hian min sawi a, engmah chutiang a awm lo. Vawi tam party tana inhlanin Pu Siddaramaiah tan ka lo ding tawh a, Siddaramaiah hi ka thawhpui tawh thin,” tiin Shivakumar hian a sawi niin news agency ANI chuan Pathianni khan a tar lang.
Siddaramaiah duhtute chuan Bengaluru-a a chenna inah ‘Karnataka CM tur’ tih poster an tar der tawh a. Shivakumar-a in bulah pawh an tar tho bawk.
Kum 75 mi ni tawh, Siddaramaiah hian tun bak inthlan a chuh dawn lo tih a sawi tawh a, hei hi an thlan chhan a ni thei a. Hetih lai hian Shivakumar hi an party mi nghet, party dang atanga lut ni ve lo a ni a. Tuna an chak theih nana thawk rim ber, amah phei chuan ‘kum thum mu tawh lo’ inti a ni a, a phu hle bawk.