Aizawl: Health Minister, Dr. R. Lalthangliana’n Covid-in kum hnih chuang a tibuai chung pawhin Zoramthanga kaihhruai sorkarin hna tam tak a thawk niin a sawi.
Inrinni khan Serchhip District Hospital a tlawhnaah he thu hi Dr R Lalthangliana chuan a sawi a. Sorkar term tawp dawn thlengin ram tana rotling thil lian tak tak thlengin, hna ropui tak tak an thawk niin a sawi.
Health minister chuan Serchhip District Hospital thar, Rs. nuai 2,000 senga sakna tur hmun leh a sak dan turte pawh enfiah nghalin he building sakna senso tur hi Power Grid Corporation of India atanga hmuh tur a nih thu a sawi a. District hospital thar sa turin thil tam tak chin fel hmasak ngai a awm thu te, tuna building hman lai thiah a niha damlote enkawl lailawkna tur ngaihtuah hmasak a tul thu te a sawi.
Inrinni vek khan health minister chuan Hnahthial Bawrhsap Pisa thar tur, Rs. nuai 1,000 hmanga sak mek pawh tlawhin tuna sak chinah chuan a sak tha a tih thu a sawi a. Kumin August thla chhung ngeia luah tura hawn theih tura peih hman turin hnathawktute chu a chah.
Hnahthial District Hospital thar, khum 50 awmna tur, Rs. nuai 1,700 hmanga sak mek pawh health minister chuan a tlawh a. Hnahthial Circuit House sak tur pawh enfiahin Hnahthial District Inter Branch YMA Volleyball Tournament kharna hun pawh a hmanpui bawk.