Cyclone na tak, category-five storm nena intluk chuan Bangladesh leh Myanmar vaukamte chu Pathianni khan a nuai ta.
Cyclone Mocha hian ruah tam tak bakah darkar khata km 195 thlenga chak thlipui a keng tel a. Hei hian Bay of Bengal hnaih ramah tui lian pawh thlen thei tur a ni.
Tuipui pawh metre li vel laia sanga phul thei niin hmun hniam laite chu tuam vek thei tura a ni.
Khawvela refugee camp lian ber, mi maktaduai khat dawn awmna, Bangladesh-a Cox’s Bazar-a mi pawh a nuai tur zinga mi a ni.
Khawchin thlirtute chuan Cyclone Mocha hi kum 20 dawn chhunga Bangladesh-in a thawk na ber tur niin an sawi a. Mi 5,00,000 chuang chu hmun himah sawn chhuah an ni.
Khawmual a kai hma atang tawhin vaukam hrulah ruah a sur nasa hle tawh a. Myanmar-a Sittwe khawpuiah chuan chhun dar 1:00 (India-ah dar 12:30) vel atang an buai hle tawh.
Sittwe chhehvelah hian electric leh wi-fi connection a chhe nasa a, video thehdarha a lan dan chuan tui fawnin thil nawi a len nasain khawlaiah a chhek nasa hle.
Telecom tower pakhat pawh thliin a chhem thlu a. Social media-a video darhah chuan Yangon-ah chuan thliin in chung a hawk leh khawlaia thil tar a chhem chhia pawh hmuh tur a awm.
Mrauk U khawpuiah pawh thing tam tak a chhem thlu a, in chung rangva pawh khawlaiah a ler remrum a, mi tam tak hmun him pana tlanchhe lai pawh a lang.
Tual chhung chanchinbu chuan Myanmar-a Rakhine-ah mipa naupang kum 14 mi chu thingin a delh hlum niin an tar lang a, Myanmar hmun dangah pawh hetiang chhiatna hi a awm nual.
Bangladesh-ah pawh thli a thawh atangin ruah a tam a. Cox’s Bazar-ah chuan khawlai a reh a, thing a tlu a, chhun mah ni se khua a thim hle bawk.
Bangladeshi meteorological department office chuan cyclone laili, km 75 bial chhung velah chuan darkar khata km 195 atanga 215 thlenga chakin thlipui a thaw thei niin a sawi.
Dhaka-a sorkar waring centre-a mi, meteorologist Dr MM Malik chuan cyclone hi km 520 zet bial a nih thu leh vaukama a kai hun chhung pawh a rei niin a sawi.
Mocha thawk tur avang hian a bul hnai thlawhna tumhmunte chu khar a ni a, sangha mantute pawh tuipui dai lo tura tih niin hmun him lova chengte khawsakna tur hmun 1,500 chuang siam a ni bawk.
Mocha hian ruah tam tak a ken dawn bawk avangin lei a min nasa thei dawn tih asawi lawk ani a. Lei a min fona, tlang rama chengte pawh inralring tura hriattir an ni.
Mi tam takin an ngaihven chu Rohingya raltlante khawsakna, Cox’s Bazaar leh Myanmar khawthlang lam vaukam a ni.
UN humanitarian co-ordinator AI Ramanathan Balakrishnan chuan, “Cyclone-in a nuai theihna laiah hian engmah a thlen loh lai pawha puih ngai em em rengte an awm a, mi sang tam tak chu dinhmund derthawng lehzualah an awm dawn a ni,” a ti.