- Lallunghnema, Charity Lodge
Consumer Protection Act 2019 leh Legal Metrology Rules bawhchhia- a thil siam kum phuah chawp ve ngawt te, thil man ziak tihdanglam a,a man zat phuah chawp-a, lo ziah ve ngawtte hi mi duham ho rilru chhiatzia tihlanna mai a ni a. Dan bawhchhiatna a niin lei chawi theihna a ni. Kristiante chuan tih loh tawp tur a ni e. Chawlh kartin Thawhtanni apianga consumer- te dikna leh chanvo ziak thin ka nih avangin kar kalta pawh khan hetiang lam hi ka rawn hrut a ni.
Tun tumah hian Electric leh Taxation- te hlawhtlinna chanchinbu pakhat The Aizawl Post ni 29,April.2023-a chhuakin a tarlan chu ka han khar chhawng a ni. Mipui tapchhak nghawng zel a nih avangin a pawimawh satliah lo khawp mai. I tan leh in chhungkaw tan ka rawn chhawp chhuak ve ta thawr mai a ni. Lo tangkaipui mawlh teh u.
Electric chungchangah chuan hetiang hian he chanchinbu The Aizawl Post hian April ni 29 khan a ziak a.
‘P&E in cheng vbch. 137-in revenue target an khum’.tiin.
‘Power & Electricity Department chuan sum thawk chhuak tura tuksak (target) an nih zat aia vaibelchhe 137 a tam an thawk chhuak.
Mizoram Finance Department chuan 2022-2023 sawrkar kum chhunga sum thawk chhuak tura P&E a tuk, revenue target chu vaibelchhe 600 a ni a, Department hian hemi hun chhung hian eng chhit man leh thil dang atangin revenue target hi khumin cheng vaibelchhe 737 a thawk chhuak a. Hei hi zaa 122 a ni. Joint Electricity Regulatory Commission-in revenue target a pek erawh cheng vaibelchhe 403 a ni thung…. Chhunglut tam ber chu Revenue Sub. Div II, Aizawl niin cheng Vbc 157.17 an thawk chhuak. Mamit Power Sub. Div. leh Champhai Power Sub. Div-in an dawt thung.
Technical & Commercial loss tih tlem kawnga thawk tha ber chu Champhai Rural Sub.Div an ni….. Transformer venhim hna thawk tha Division 5 – Distribution Div I, Aizawl South, Distribution Div III, Aizawl Central, Revenue Div I, Aizawl North, Tuipang V Power Sub Division leh Maicham Hydel Project Sub Division-te chuan 2022-23 chhungin tranformer pakhat mah an tichhe lo.
Ka lo hriat danin P&E hian Electrical Safety Week ni 28 khan an hmang a, he hunah hian he thu hi P&E hotu ten an tarlang a ni.
Kawlphetha hmangtute hi Consumer kan ni a. Bill pek hi kan ‘duty’ a ni. Eng tel lovin kan khawsa thei lo, P&E tel lovin kan tal thei lo. Chutiangin Consumer te tel lo chuan P&E in awmzia a nei hek lo. Inring tawn vek, innghat tawn vek kan nih hi! Bill sang kan sawisel a, bill a san lohin lawm nachang kan hre si lo! Kum kan hman lai 2023-25 tariff pawh tihsan a ni lo. Mipuite u, lawm teh u. A rukin electric pawt suh u. Electric ren rawh.