India-a eptu party lian ber, Congress party chuan Prime Minister Narendra Modi-a kaihhruai BJP chu Karnataka state inthlanah an hneh.
Mi thiamte chuan hnehna an chan hi an mamawh em em mai, nakuma ram pum inthlan tur atan Congress party mite rilru a tihphurhna turah an ngai a. Karnataka hi India chhim lama BJP-in thuneihna an channa chhun ni tawhin tech hub Bengaluru awmna a ni bawk a, kumina state lian inthlang tur panga zinga a hmasa ber a ni.
Congress hianbial 224 awmah bial 135 an la a, sorkarna siam tura 113 lak ngai chu an tlin hle a. BJP hian bial 66-ah chauh hnehna an chang thung.
Congress tantute chu hnehna chan lawmin Bengaluru-a an party hmunpui leh New Delhi-ah an phusa nasa a, party flag vaiin hnehna hla an sa.
“Huatna dawr chu khar a ni a, hmangaihna dawr hawn a ni ta,” tiin Congress hruaitu, Rahul Gandhi chuan Delhi-a an party mite hnenah a sawi.
Inrinnia vote chhiara an chak lo tih a chian hnuah BJP hruaitu, Chief Minister Basavaraj Bommai chuan an chak loh a pawm thu a sawi nghal a, ‘prime minister leh party worker thawkrim tak tak awm mah se an tum an hlen pha ta lo’ tih a sawi.
Modi-a hi inthlanah hian a campaign nasa hle a, ni 10 chhungin rally leh roadshow-ah vawi tam tak a inlan a. Congress hi ram puma an hruaitu, Gandhi bakah party president Mallikarjun Kharge, state hruaitu Siddaramaiah leh DK Shivakumar (an pahnih hian chief minister atana rinkai ve ve) ten beihpui an thlak nasa hle bawk.
Congress thupuangtu, Akhilesh Pratap Singh chuan Karnataka inthlan result hian nakum inthlanpui tur chu nasa takin a nghawng dawn niin BBC hnenah a sawi.
“BJP hian kumina Madhya Pradesh, Rajasthan, Telangana leh Chhattisgarh inthlanah pawh hnehna an chang dawn lo va. Modi-a pawh nakumah hneh a ni ang,” a ti.
Hetih lai hian BJP thlawptu political analyst, Suvrokamal Dutta chuan inthlan pakhata hnehna chan hian Congress lian viauna tur a hril chuang lo niin a sawi ve thung.
“Narendra Modi hi Congress party tan a la lian lutuk,” a ti.
Congress hi India-a party chak ber ni reng thin niin mahni kea a din hnu, kum 1947 atanga 2014 thleng khan hun reilo tete tih loh chu ro an rel deuh ngar ngar a. Modi-a ho hian BJP-in kum 2014-ah paih thlain hemi hnuah an tho leh thei mai lo a ni.
Karnataka-a hnehna an chang leh ta hi Congress tan a lawmawm zualna pakhat chu thla hnih pawh la tling lovah khah an president hlui, Gandhi-a chu mi tihmualpho thubuaiah thiam loh chantirin MP atanga bân a ni bawk.
Mi thiamte chuan Karnataka-a kum li ro lo rel tawh, BJP hi mipuiin an ning niin an sawi a. An hun chhung hian hmasawnna an thlen tam loh bakah an sorkar a chhia nia puhna a tam a. Party hruaitute pawhin an state-a an hlawhtlinna ai mahin ram puma Modi-a kaihhruai sorkar hlawhtlinna an sawi nasa zawk.
Congress hian ‘an hlawhchhamna laiah zel an bei’ a, inlungrualin an bei bawk niin political analyst Vijay Grover chuan a sawi.
“Pu Modi-a hian ama ngaihawmna leh a tihthat hmangin mipuiten an party an hne-na sut kian a tum a; mahse, a beisei angin a thawk zo lo a ni,” a ti a. Hetih rual hian prime minister hming larna hi ram pum anga chhut chuan a la lian hle niin a sawi bawk.
Congress hian thil man sang, hna nei lo tam leh BJP sorkar chhia chu mipuite an hnena hip nan hmangin an aupui nasa.
Bengaluru-a cheng tam tak chuan Congress hi an phur a, ruahmanna fel tak nen an campaign a, BJP chak lohna lai chat chat an chuk niin an sawi a. Shivakumar leh Siddaramaiah te thawk dun thain mipuiin sorkar an ninna rilru dek chat chat zelin an che bawk niin an sawi.
Inthlan campaign boruak pawh a sang a, party pahnih hian retheite puihna tur pawh tiam nasain a thlawhna gas cylinder leh electric pek pawh a tel.
Congress hian Hindu pawl, Bajrang Dal khap a tum bawk a, hei hian sawi ahlawh a. Congress hian Bajrang Dal chu nikuma Muslim pawl dan pawna dah tawh, Popular Front of India (PFI) nen an inang reng niin an sawi.
BJP chuan Congress hi ‘Hindu do’ tia sawiin zawng pathian, Hanuman, Bajrang Bali an tih zuitute rilru a tina tih an sawi.
Congress hruaitu, Singh chuan Karnataka-a voter-ten ‘inthenna leh chi inhuatna politics’ an hnawl niin a sawi a. Gandhi-a’n January-a a zawh tak, ‘inpumkhatna kawngzawh’ khan Congress member-te a tiphur thar niin a sawi bawk.
Dutta chuan Congress hi chak lohnain a bawm chu laksak a ni ta niin a sawi a, a hmaa state tam tak, hmar leh hmarchhaka an tlawm tawhna atangin an tho leh niin a sawi a ni.
Political analyst leh lehkhabu ziaktu, Sugata Srinivasaraju chuan Karnataka inthlan result hian ram puma Congress chet thatna a hrilh lo niin a sawi.
“Kum 2024-a thil thleng chu a dang daih dawn a, hetiang hi a lo ni tawh thin bawk,” a ti.