Aizawl: Karnataka state inthlana BJP sorkar paih thlak a ni chu India ramah Congress party a tho leh mek tih lantirtu a nih thu Mizorm Pradesh Congress Commitee (MPCC) chuan an sawi.
Inrinnia thuchhuah an siamah MPCC chuan Karnataka inthlana Congress-in hnehna a chan theih chhan chu India rama sakhaw zalenna duhtu mipui tam takin Congress-ah beiseina thar an neih mek vang a nih thu an sawi a. Karnataka inthlan result hi central-ah Congress party tlu chhe mek leh tho leh tur awm tawh lo ang hiala sawi thintu, MNF leh ZPM party hotute thusawiin belhchian a dawl lohzia lantirtu a nih thu an sawi bawk.
MPCC chuan Mizoramah pawh Lalsawta kaihhruai Congress party-in hmasawn lam pan zelin CADC inthlanah beiseina sang lo tak karah seat li lai a chang thei a; central-a rorel lai, BJP leh Mizorama rorel mektu, MNF-ten sum leh pai tam tak nena thapui an thawh chunga Congress party candidate pali ngawt an tling thei chu an hmasawnna nasa tak lantirtu a nih thu an sawi.