Aizawl : Khawzawl district level narco coordination centre (NCO- RD) chu Khawzawl Bawrhsap K. Lalrohlua hovin an thukhawm a. An hmalakna thlirletin, hmalak zel dan tur te an sawiho.
Bawrhsap chuan ruihhlovin khawtlang nun a tihchhiat dan leh ruihhlo do kawnga thawhhona tha neih a tul thu a sawi a. Ruihlo dona atana hman tur sorkar atanga Rs. nuai 5.5 an dawn thu a sawi bawk.
Khawzawl district NCORD chuan kum kal meka damdawi hman sual leh ruihhlo thatloh zia inzirtirna (awareness campaign) neih dan thlirletin, May thla chhung hian Vankal, Vanchengpui, Chhawrtui leh Khawzawl khawpui chhung sikul hrang hranga zirlaite zingah ruihlo thatloh zia inzirtirna, awareness campaign neih tura ruahman chu chak taka bawhzui ni se, an ti.