Mizo Zaimi Inzawmkhawm (MZI), 05 Riders leh Mizo Zirlai Pawl, District Headquarters, Kolasib te țangkawp buaisaihin May 13, 2023 Inrinni chawhnu khan Kolasib-ah, ‘Charity Concert’ neih a ni a. John LT Sanga, Deputy Commissioner chu khuallian niin, Thomas D.Lalengliana, President, Sub-Headquarters YMA Kolasib chu khual zahawm a ni.
Deputy Commissioner John LT Sanga chuan kan state thenawm a buaina thleng avangin Kolasib district-ah kan unau zohnahthlak raltlan țhahnem tak an awm thu sawiin hun harsa leh buaina kar a unaute pui theitu nih chu thil hlu tak a nih bak a țanpuina dawngtu tan pawh a lawmawm dan a thuk bik thu a sawi.
Khual zahawm Thomas D.Lalengliana, President, Sub-Headquarters YMA chuan zohnahthlak zingah țawng, thuam inbel leh ziarang ah inan lohna deuh nei țhin mah ila, kan inanna tam zawk avanga induhsak leh ințanpui tawn tur kan nih thu sawiin hun harsa kar a ințanpuina chuan inunauna leh inpumkhatna țha a hrin chhuah ngei a beisei thu a sawi bawk.
Charity Concert buatsaih ah hian Kolasib khaw chhung a MZI member zaithiam țhahnem tak an zai a, 05 Riders leh MZP ten an țawiawm.