A hlapui, ‘Tattoo’ hmangin Sweden zaithiam lar Loreen chu a vawi hnihna ni turin Eurovison Song Contest-ah a champion leh ta.
Kum 2012 a lo champion tawh hian amah hnaih bertu leh elpui ber ni bawk Finland singer Kaarija chu a khum a, intihsiakna boruak sang tak leh inhnaih tak an nih avangin result puan dawn phei chuan boruak a rit hle.
Loreen hi Eurovision-a vawi hnih champion thei pahnihna a ni ta a, Ireland zaithiam Johnny Logan record a tlukpui ta chiah a ni.
“Min barakhaihin, awmngaihna hriat a har hle mai. Ka lawm takzet a, thinlung takin ka lawm a ni. Ka beiseina zawng zawng pawha ka phak loh leh rin loh em em.. lo thleng tur pawha ka rin phak piahlam daih a ni,” tiin Loreen hian a sawi.
Sweden an chak ber vangin kumleha intihsiakna lo awm tur hi an ramah an thleng dawn a, thil lawmwm tak ni bawk chu ABBA-in 1974 kuma ‘Waterloo’ hmanga rimawi khawvel an barakhaih champha kum 50-na chiah a lo ni bawk nen, Sweden ram tam lawmna a thuahhnih ang.
Vanduaithlak takin, Ireland hi tunhma lamin vawi hnih champion thei hmasa ber ni chungin a hnu lamah an chetha lo viau mai a, kum nga zawnin semi-final atanga petchhuah an ni ta a, ram aiawha fehchhuak te chuan, ‘chhiatna liantham a tling’ an ti hial.