Aizawl : BJP Mizoram State General Secretary Malsawmtluanga chuan Narendra Modi kaihhruai BJP sorkarna hnuaiah India ramah Kristian te tihduhdah an nih thu vawiin thleng hian hriat a la nih loh thu a sawi.
Mamit bial chhung khaw hrang hrang a tlawh naah Mamit field veng-ah Inrinni khan BJP Unit thar dinin Malsawmtluanga huanb an party-ah mi thar eng emaw zat a lawm lut a. Lawm luh inkhawmah thu sawiin BJP Mamit bial viltu ni bawk Malsawmtluanga hian, Mizoramah MLA inthlanpui awm dawn apiangin dawt hmangin BJP beihna a lian thin a, thudik tawk lo hmangin an enpui party te’n an bei fo thin nia sawiin, “Nimahsela, Pu Narendra Modi-a Prime Minister tirh atangin India ramah Kristian-te tihduhdah an nih thu vawiin thleng hian kan hre lo hi, BJP min bei tute kan chhanna pakhat a ni,” a ti.
Mamit district hi district hmasawn leh changkang ni thei a nih laia, Mizorama sorkar tawh leh sorkar mek te’n an ngaihthah thin avangin district hnufual ah an la tang mek tih a sawi a. District hnufual tak lak atanga khai chhuak turin BJP Mizoram chuan Mamit bial hmasawnna turin hma an la dawn tih a sawi.