Nimin zing dar 8:30 vel khan Kawrpuichhuah panna kawng, Tlabung atanga km riat bawr vela hlaah 207 pickup chesual a, a chuang mi 14 velin hliam an tuar a, a na zual pahnih chu Lungleia inenkawl tura phurh an ni.
Vanduaina tawka chesual lirthei hian nimin tuk khan Tlabung atanga km 30 vela hla, New Khojoysury atangin Tlabung a pan a, Tlabung khaw thlen hma km riat vel a la awm tihah kawng laiah letin a chuang mi 14 velin hliam an tuar a ni.
207 pickup chetsual vanga hliam tuarte hi a hnu deuh lawka helai hmun thlengtu, Border Security Force 163 battalion-ten a remchan dan angin an buaipui a, hliam tuar thenkhat chu BSF 163 battalion ambulance-ah phurin Tlabung damdawi in an panpui a, an zinga na zual leh tlema ngaihtuahawm deuha ngaih mi pahnih chu Lunglei lamah phurh chhoh an ni.