Aizawl: Deputy chief minister, UD&PA minister ni bawk, Tawnluia chuan Inrinni khan Durtlang Community Hall-ah Aizawl Smart City Project hnuaia sak tur, Durtlang Playground lungphum a phum.
Deputy Chief Minister Tawnluia chuan Smart City hnuaia playground changtlung leh tha tak tur lungphum phum a ni chu lawmawm a tih thu a sawi a. Durtlang playground tur chu a hmunhmain a zo va, a rem em em bawk tih sawiin Mizo thalai leh infiammite tan chhenfakawm tak tur, ram chhung leh khawvel huapah pawh Mizote hming chherchhuaktu a nih ngei a beisei thu a sawi a, tangkai taka hmang turin a fuih bawk.
Khualzahawm, Aizawl Mayor Lalrinenga Sailo pawhin thu sawiin sorkar leh a bikin UD&PA department changtu minister, Tawnluia hmalakna chu ropui a tih thu a sawi.
Durtlang playground chuan eizawnna kawng hrang hrang a hawng dawn ni sawiin, “Veng chhung mipuite tan a lawmawm takzet a ni,” a ti bawk.
Durtlang playground tur hi Aizawl Smart City Limited hnuaia sak a ni a, play area tur chu 110m leh 68m niin astro turf phah a ni ang a. A project cost tura ruahhman chu Rs. vbc 17.87 a ni.