Aizawl : BJP Mizoram Pradesh President Vanlalhmuaka chuan BJP chu dawt hmanga sorkarna siam ai chuan tlin loh mai pawh an thlang zawk niin a sawi.
Thawhtannia chawlhkar thar inhlanna an pisa-ah neihah BJP Mizoram President chuan, party dangte angin BJP chuan an tih theih loh tur an sawi dawn lo tih sawiin, “Politics hi inbumna tur leh sumdawnna tur a ni lo va, keini BJP chuan dawt hmanga tlin ai chuan tlin loh mai pawh kan thlang zawk tur a ni. thudik leh ram hmasawnna tur tak thlen theitu party hi Mizo mipui te hian an la hmu fiah dawn a ni,” a ti.
Tun hnaia Karnataka inthlana BJP-in chakna an chan loh avangin an chhe ta duai tihna a nih loh sawiin Vanlalhmuaka chuan, “Kum 2014-ah pawh BJP sorkarna chu state parukah chauh a nih laiin Lok Sabha MP inthlanah erawh BJP leh a thawhpui party te chuan sorkarna siamin Pu Narendra Modi chu Prime Minister atan ruat a ni,” tia sawiin, Karnataka state-a Congress-in sorkarna an siam tak avangin Pakistan lam te pawh an huangtau sawt hle a, Islam ram din tumin hma lak tum ruh hleah a puh.
BJP Mizoram State thupuangtu K. Laldinthara kaihhruai inkhawmah hian Nirupam Chakma, MDC pawhin thu a sawi bawk.