Congress party chuan kumina MLA inthlanpui lo awm turah sorkarna an siam a nih chuan Tang Puihna hmangin mi mal, pawlho din chhuah tuma hma late bakah tang thei lo leh tan ngaihna hre lote thlengin an pui dawn tih an sawi a, sem policy nen a inang lo tih an sawi.
MPCC media department hotute chuan nimin khan Aizawl Press Club-ah chanchinbumite an kawm a, an chairman, Congress thupuangtu, Dr Lallianchhunga’n an party Manifesto No. 1-a Tang Puihna chungchang sawiin tun MLA inthlanah hian an sorkar a nih chuan hemi hmang hian chhungkaw tin chu dinhmun tha zawkah dah an tum thu sawiin, “Tang Puihna chu sem policy nen a inang lo va, a danglamna chu a mamawh tak takte chauh tanpuina tur a ni,” a ti.
Dr Maliana chuan tanpuina chu mi mal din chhuah ngei tuma tan lak tum te, la mek tawh leh lo/huan thlai nei, ran vulhtu te, sumdawnna bul tan duh leh bul tan tawh, hmasawn zel duhte chu tanpuina Rs nuai 2 emaw, an mamawh dan azirin a aia tam pawh an pe dawn tih an sawi.
District level, constituency level, block level, khua leh veng, society/association/zau ang zawnga an mamawh intawm chi hrang hrang – kawng, godown, tui lakna, cold storage, sawngbawlna siamna atan cheng vaibelchhe tel tanpuina pek theih a ni dawn tih Dr Maliana chuan sawi bawkin, “Tang Puihna Policy-in a tum ber pakhat chu thar chhuah tam, thawhchhuah tam a ni,” a ti.
MPCC media hotute chuan an party policy hnuaiah hian area-a zirin thlai chin tur bik fel taka siam a ni ang a, company biak fel sa vek an ni ang a, lo neituten a hralhna tur a awm tih hre sain lo/huan an nei tawh dawn tih an sawi a, ran vulhtute tan marketing ruahmanna siam a ni ang a, online leh offline-in farmers’ market siam a ni ang a, hnathawktute tana harsatna thlen thei dante siamthat a ni anga, Marketing buaipuina tur cheng Vaibelchhe engemawzat Budget-ah dah a ni dawn tih an sawi bawk a ni.