Myanmar-a sipai hruaitute chuan Pathiannia Cyclone Mocha-in a nuai hnuah Rakhine state pum chu ‘khuarel chhiatna thlenna hmun’ tiin a puang a, mi paruk an thi tawh.
Tun tuma cyclone thawk hi tun kum zabia Bay of Bengal atanga thawk zinga a na ber pawl niin Myanmar leh Bangladesh a nuai a ni.
A tira hlauhthawn ang erawh chuan khawvela refugee camp lian ber, Bangladesh-a Cox’s Bazar chu a nuai lo hlauh thung.
Hetih rual hian category five storm hian Myanmar-a vaukam a hrut na hle a, chenna in za tel a tichhia.
Ruah tam tak, thli na tak leh tui fawn sang tak chu Rakhine hmun hniam lai, a bikin an state khawpui, Sittwe-ah a nasa hle.
Tual chhung mite chuan an khawpui 90% vel a chhia niin an sawi a. Darkar khata km 209 zeta chak thlipui hian inbiakpawhna hrui a tichat a, a ban leh thing a chhem thlu nasa hle bawk.
Rohingya raltlante awmna camp pawh a tichhia a. Myanmar khawthlang lama awm, Rakhine hi kum tam tak chhung chi leh chi intihbuaina thin hmun a lo ni tawh.
Cyclone Mocha hi tuipui atangin Myanmar-a Kyaukpyu khua leh Cox’s Bazar inkarah Pathianni chhun lai velin khawmual a kai.
UN hnuaia humanitarian assistance office chuan ‘khaw awm dan uchuak tak’ leh inbiakpawhna tha lo chuan chhiatna thlen dan kimchang hriat a la tiharsa tih a sawi.
“Report dawn tawh chinah erawh thil a chhe nasa a, dinhmun derthawnga awm sa, a bikin raltlante chuan puih an mamawh zual hle,” an ti.
Thi parukte hi Sittwe-a mite vek niin thuneitute chuan an sawi a. Tual chhung chanchinbute chuan mipa naupang kum 14 mi chu thing tluin a delh hlum niin an sawi.
Thlalak leh video thehdarhah chuan chenna in chung thliin a len te, telecom tower tlu, khawlaia thil tar a le leh in chim hmuh tur a tam hle.
An thenawm, Bangladesh-ah chuan cyclone hian chhiatna lian tak a thlen lem lo va; mahse, lei min leh tui lian erawh a tam niin thuneituten an sawi a. An ramah thi an awm hriat a la nih loh thu an sawi bawk.
Cyclone a thawh hma hian khawmuala awm khaw tam taka cheng mi 7,50,000 chuang zet hmun himah sawn chhuah an ni.
Ram laili deuhvah pawh mite chu ruah leh thlipui laka an him theihna tur hmuna insaseng tura hriattir an ni bawk.
Sikulah te an inhnawh khawm a. Nu nau pawm te, naupang tenawi leh kum upa tak tak thlengin, sikul dawhkan leh thutthlengah muin an insaseng a ni.
Thenkhat chu rickshaw leh kein an insaseng a, an ran vulh – ar leh a dang kenga an khua atanga darkar hnih vela hlaa insaseng pawh an awm nual bawk.
Scientist-te chuan cyclone hi sik leh sa inthlak nasa avangin a na telh telh niin an sawi a. UN pawhin Cyclone hi Myanmar-in a tawrh tawhah chuan ‘a na ber zinga mi’ tiin a sawi a ni.