Cyclone Mokha-in Mizoram hmun hrang hrangah chhiatna a thlen nual a, chenna in 282 a chhem chhia a; mihring thi leh hliam an awm lo nia hriat a ni.
Disaster Management & Rehabilitation Department hotuten The Zozam Times an hrilh danin, nimin tlai dar 5 thlenga an chhinchhiah chinah thlipui tleh kha Siaha district chhungah a thawk na hle a, khaw 26 nuaiin chenna in 112 a chhem chhia a, chung zinga 23 chu luah zui tlak lohin a chhia.
District dang, Lunglei chhungah pawh thlipui thawk hi khaw pariatin an tuar na a, in 35 chhiaah in pali chu luah zui tlak loh khawpa chhia a ni a. Lawngtlai district chhung khaw pariatah in 79 chu chhem chhiain in pahnih chu luah zui tlak loa chhia a ni a. Mamit district chhung khaw paliah chenna in pariat chhiain, luah zui tlak loh khawpa chhia a awm lo thung.
Champhai district chhunga khaw pakhatah in chhe nasa vak lo pakhat a awm a, Serchhip district chhung khaw hnihah thlipui avangin in chhia 15 a awm a, Saitual district chhung khaw pahnihah thli chhem chhiat in 17 awmin in pakhat chu luah zui tlak loh a ni a, Khawzawlah in pakhat a chhe bawk.
Inrinni leh Pathiannia thlipui tleh avanga Mizoram chhunga in chhe zawng zawng chu a vaiin 282 niin luah zui tlak lo khawpa chhia chu 30 a ni.
Cyclone Mokha hi Siaha district-in an tuar na ber a, chenna in chhia pawh a tam ber a, chenna in bakah electric ban te, internet line te pawh a chhia a, Siaha district chhungah hian inbiakpawhna a hman mumal theih loh phah a. Lawngtlai district chhungah pawh thli thawk hian electric line-te a tichhe bawk.
Thlipui thawk hian Myanmar raltlan awmkhawmna camp-te pawh a nuai na hle a, Lunglei-ah raltlan mi 131 khawsakna camp pahnih, Siahaah camp pahnih, mi 141 khawsakna, Lawngtlaiah camp pathum, mi 396 khawsakna leh Hnahthialah camp pakhat, mi 40 awmna camp te chu a nuai chhia a, mihring thi leh hliam erawh an awm hriat a ni lo thung.
Cyclone Mokha khan Mizoram chhunga khaw hrang hrang nuaiin chhiat thleng mah se mihring thi leh hliam an awm erawh hriat a ni lo thung a. Thlipui tlehin a tihchhiatte hi nimin khan senghawi a ni a, khaw thenkhatah chuan in chhiate thawm thaa hnatlan a ni.