Aizawl : Nimin khan Kolasib-a DRDO Conference Hall-ah Kolasib district chhunga four lane kawng kal dan tur chungchang inhrilhriatna hun neih a ni a, Turial bialtu MLA K.Laldawngliana’n a telpui.
He thutkhawm hi Kolasib bawrhsap John LT Sanga’n a kaihruai a, Kolasib district chhunga PWD, PHE, P&E leh Divisional Forest Office hotute leh Kawnpui, Khamrang leh Mualkhang khawtlang hruaitute an tel a, NHIDCL Project Management Unit, Kolasiba thawktuten 4-Lane kawng kal dan tur an sawifiah.
An tarlan danin, Bharatmala Pariyojna hnuaia NHIDCL kaltlanga 4-Lane kawng siam tura Package 3,4,5,6 leh 7 hian Kolasib a paltlang dawn a, Vairengte leh Sairang inkar kawng thui zawng hi Km 111 niin kawng thar siam tur hi 90.25 Km a thui a ni thung.
Kawng kal dan tur ruahmanna hi siam fel vek tawh niin Mualkhang a lei 500 Metre chu lei dawh zinga sei ber tur a ni a, lui luang tibuai lo tur ang berin ruahmanna siam a nih thu leh kawng sir ah thing phun dan tur ruahman tel a nih thu tarlan a ni.
Leivung dah khawlna tur engemaw zah endik a nih thu te, Motor lian tan a zawh nuam tur a zal a siam tur a nih dan te leh Sairang chhak a motor intawhkhawmna Junction ruahman dan te tarlan a ni bawk a. Toll booth dah a nih loh tur thu leh hna hi thawh tan a nih atanga kum 2 chhung a thawh zawh tur a beisei a nih thu sawi a ni bawk.