Mizoram University-a Department of Mass Communication buatsaih, ram mipuite inpumkhatna chungchang zirhona National seminar chu nimin khan tan a ni a, Larsap Dr Hari Babu Kambhampati-a’n a hawng.
Larsap chuan ram pakhata chengho, hnam ziarang leh khawsak phung inang lo tak takte indawh tawna tha taka awm tlan chu India ram angah phei chuan a pawimawh hle tih sawiin, “Inpumkhatna tura theihtawp kan chhuah tlan hi khua leh tui zawng zawngten kan mawhphurhna a ni tih kan hriat thar leh a ngai,” a ti.
Tun hma deuh kha chuan India hmarchhakte chu en hran deuh a ni mai awm mang e tih tur a ni a; mahse, Narendra Modi-a prime minister a nih hnuah erawh zawi zawia siam that a nih thu te, tunah phei chuan mainland India leh India hmarchhakte an intlawhpawh nasa sawt a, kawng engkimah – ram hmasawnna, inkalpawhna leh inpumkhatna ang zawng pawhin India hmarchhak hmasawnna hmuh theihin a awm tih a sawi a ni.
Seminar-ah hian Department of Mass Communication-a Associate Prof Dr Irene Lalruatkimi’n seminar thupui a sawi hawng a, Khualzahawm Prof Sunil Umrao, University of Allahabad hnena atangin seminar-in a tum leh a thu ken pawimawh zualte ngaihthlak chhunzawm a ni leh a. MZU hotuten thu an sawi bawk.
Seminar hi ni hnih chhung neih tur a ni a, hemi chhung hian session ruk neih a ni a, session tinah hian seminar thupui hnuaiah zir bing tura mi thiamten an thuziah an chhawp chhuah hrang hrangte zirho a ni dawn a ni.