Lunglei Municipal Council (LMC)-a Councillor te chu an Chairman Lalzuithanga hovin Aizawlah sorkar hotute dawrin an awm mek a. Vawiin khan Dy. Chief Minister, UD&PA Minister ni bawk Tawnluia hmuin, tul leh pawimawh hrang hrang an sawipui.
Dy. Chief Minister chuan LMC member te chu duhsakna lo hlanin LMC-in Lunglei khawpui hmasawnna atana tluang taka hna a thawh theihna turin state sorkarin a tih theih apiang a tih tur thu a lo hrilh a. Dilna leh rawtna an thlen te pawh a lo bawhzui tur thu a hrilh.
LMC-a councillor te hian vawiin vek khan UD&PA Secretary leh Director te pawh kawmin, ZPM office tlawhin, President Lalliansawta leh hruaitu dang te nen an inkawm bawk.
LMC Chairman Lalzuithanga chuan sum awm hma pawhin senso ngai lo chi hna thawh theih ang ang thawh an tum thu a sawi a. Hmasawnna hnathawhna tur sum te a awm hunah chak zawka Lunglei hmasawnna tura hnathawh dan tur te an ruahman lawk thu a sawi.
LMC Councillor te hian naktukah Chief Minister Zoramthanga an hmuh bakah AMC office tlawhin Aizawl Mayor leh hotu dangte an kawm bawk ang.