Aizawl: Law Minister TJ Lalnuntluanga’n 23 Sector Assam Rifles hotu hnenah AR-te chu mipuite tiralti zawnga khawsa lovin, an rinngam ni turin a chah.
Law minister hian nimin khan Motor Bike Rally kharna hun a hmanpui a, hemi hnuah 23 Sector Assam Rifles, Aizawla DIG Brigadier Girish Upadhya nen an inkawm a, ramri hrula awm khuate chu eizawnna mumal tak nei lo an nih avanga ram dang nena sumdawnna kalpui kawngah hraitthiamna zau tak neih a tul thu a hrilh.
Minister Manuna chuan Assam Rifles-te chu ‘tlang mite thian’ an nihna ang takin mipuite tiralti zawnga khawsa lovin, an rinngam ni turin a chah bawk a. Assam Rifles, NGO leh Kohhran-te inkarah thawhhona tha a awm zel theih nan hmalak tlan zel an tum thu an sawi bawk a ni.
Manuna leh AR hotupa hian Champhai district chhunga sumdawngten harsatna hrang hrang an tawhte chu a rang lama sutkian a nih theih nan a hmunah ngei tlawh dun ngei turin thu an thlung dun a ni.
23 Sector Assam Rifles leh Mizoram Outdoor Youth Club tangkawp buatsaiha Motor Bike Rally kharna a hmanpuinaah hian Minister Manuna chuan bike rally thil tum -ruihhlo laka fihlim, environment humhalh, ramri khuate tana sorkar laipui scheme hrang hrang leh sainik/army school-a lut tura inzirtirnate chuan rah tha chhuahin a hlawhtlin ngei a beisei tih a sawi a, Harsatna tam tak paltlanga rally hlawhtling tak neih a nih chu ropui a tih thu a sawi.
Motor Bike Rally-a telte hian May 4 khan Aizawl an chhuahsan a, ramri khua hrang hrangte tlawh a nih hnuiin nimin khan Aizawl an thleng a. Nimina ‘Bike rally’-a kalte lo hmuahna inkhawm hi Riflewoman Chauhan chuan khaihruaiin Major Aditya Chauhan chuan rally neih dan a tar lang bawk a ni.