Mizorama NGO coordination committee hruaitu ten nimin tlai khan Union Home Minister Amit Shah chu a pisa-ah hmuin, Manipur-a buaina a reh thuai theihna tura hma la tur leh Manipur buaina tuartute chhawmdawl hna chak taka thawk turin an ngen a, memorandum an thehlut bawk.
Thudawnnain a sawi danin Union Home Minister chuan Manipur buaina chu a mawhphurhna a nih thu leh an enzui reng thuin NGO coordination committee hruaitute chu a lo chhang a. Tun atanga ni reiloteah Manipur boruak chu a muanawm a beisei thu leh mipui mamawh ei leh in te pawh Manipur-ah a luh mek thu a lo hrilh.
NGO co-ordination committee hruaitute chuan Manipur buaina Zofa ten an tawrh nasat thu leh mahni inlum pawh luah ngam lova Mizoram leh hmun hrang hranga an raltlan Union Home Minister chu hrilhin, he thil thleng avang hian khawvel hmun hrang hranga Zofate rilru a na hle tih an hrilh a. He buaina avanga zirna bahlah zawng zawng, a bikin Mizoram aṭanga Manipura lehkhazir ten tha tak leh boruak muanawm tak hnuaia zirlai an chhunzawm thuai theihna tura hmalak ran a tul thu an thlen.
Manipur-a buaina a reh theihna turin Manipur-a cheng hnam hrang hrang ten an pawm tlan theih tur inremna a awm thuai theihna tura hma la turin Union Home Minister chu an ngen a. He buainain North East hmun hrang hrangah hlet thalo a chhuah belh loh na tura ngaihtuahna seng tur leh boruak thlir reng turin an ngen bawk.
Mizoram NGO hruaitute chuan Union Law Minister Kiren Rijiju pawh a chenna in-ah hmuin, Manipur buaina irhchhuah chhan nia lang Manipur High Court order leh Supreme Court inrawlh dan chungchangte an sawipui a,. Kiren Rijiju chuan Special status chungchang chu High Court thuneihna a nih loh thu sawiin, North East MP Forum ten boruak muanawm a awm leh thuai theihna tura theihtawp an lo chhuah thu NGO co-ordination committee hruaitute chu a hrilh.
Nimin vek khan Indian National Congress hruaitu Rahul Gandhi pawh NGO hruaitute chuan a chenna in-ah hmuin, Manipur buaina chungchang bawk an sawipui a, a hmalak theihna chinah a theih ang anga he buaina a reh theihna tura hma la tur leh en zui reng turin an ngen a, memorandum an thehlut bawk.
Rahul Gandhi chuan Manipur buaina chu a lo hriat tawh thu leh a tul anga a lo en zui ve reng tur thu NGO co-ordination committee hruaitute chu a lo hrilh a ni.
NGO co-ordination committee hruaitute hian Delhi-ah hian Meghalaya Chief Minister Conrad Sangma leh Nangaland MP te bakah, mipawimawh dang te pawh an hmu a. Delhi a pawl hrang hrang aiawh te nen Mizoram House-ah an inkawm bawk.
NGO co-ordination Committee hruaitute sorkar laipui dawra an kal leh hawna leh Delhi an cham chhunga senso zawng zawng chu Mizoram sorkarin a tum a. Sorkar laipuia mipawimawhte an dawr kualnaah Mizoram MP pahnih bakah, Mizorama party hrang hrang hruaitute leh mimal thahnemngai engemawzatin kawng hrang hrangin an lo tanpui bawk a ni.