PC party-in Manipur-a Zofa MLA 10 ten inawpna (administration) hran an phût mek chu an thlawp thu an sawi.
PC party hruaitu ten nimin khan an President Vanlalruata hovin Aizawl press club-ah thuthar thehdarhtute kawmin, he thu hi an sawi a. PC President chuan “Keini PC party chuan Manipur-a Zofa MLA 10-in Manipur-a Zofate tana inawpna (administration) hran an phut hi kan thlawp a; a theih leh remchan anga tanpui kan remti” a ti.
Vanlalruata chuan, “Historian ten Chin-Lushai-Kuki an tih hi hnam khat leh unau niin, tuna Bangladesh, Burma leh India ram chhung zau tak hi kan ram a ni” a ti a. “Burma leh India-a lalram ropui leh zau tak tak awm tawh te khan min awp ngai lova, kan chhehvela hnamdang lal ram din ten min awp ngai hek lo” a ti.
“British colonial power-in tharuma min lak hma khan tumahin kan ram hi min awp ngai lova, tharuma kan ram min hnehchhuhsaka, min thendarhsak kha PC party chuan kan pawm thei lo” PC party President chuan a ti a. “Insuihkhawma rorelna pakhat hnuaia awm kan duh avangin Brig. T. Sailo hovin Zo Re-unification Organisation (ZORO) pawl hial kan lo din tawh” a ti.
PC party President Vanlalruata chuan ZORO hmalakna pawh an thlawp reng thu sawiin, a hlawhtlin hun nghakhlel taka an thlir reng thu an sawi a. “Zofate insuihkhawm mai bakah hian kan ram leh chenna hmun khawilaiah pawh Zofa ten hnamdang laka inawpna (administration) hran neih kan duhin chutiang atana hma- lakna chu kan thlawpin kan theih ang anga tanpui kan inhuam reng a. Tuna Manipur-a Zofa te tana inawpna hranpa phutna pawh hi PC party chuan a tawp thlengin kan thlawp tlat dawn a, hmuntina Zofate tanrualpuiah ka sawm a ni,” PC President Vanlalruata chuan a ti bawk a ni.