Deputy Chief Minister, UD&PA Minister ni bawk Tawnluia’n tukin khan Khatla venga Industry office kawt-ah Aizawl smart street lungphum a phum.
Sorkar thuchhuahin a tarlan danin, Aizawl smart street siamna atan hian Rs. vaibelchhe 3.28 ruahman a ni a, he hna hi Unique Consultancy service thawh tur niin, mechanical parking, open gym leh intihhlimna tur thil chi hrang hrang awm thei tura ruahman a ni.
Aizawl smart street lungphum phumtu Deputy Chief Minister chuan smart street enkawl zui turin sorkar, kohhran leh khawtlang hruaitute thawhhona tha a pawimawh dawn niin a sawi a. Smart street atana siam tur hmuna lo awm hmasate hmun danga sawnchhuah a tul avangin he hna hi an tan mai thei lo nia sawiin, a thawktu tur te leh contractor-te chu chulmam nawn ngailova felfaia hna thawk turin a chah.
Deputy Chief Minister chuan Aizawl Smart City atanga cheng vaibelchhe tam tak an hmuh hmanga project hrang hrang kalpui mek a nih thu a sawi a. Smart City hnuaia project te chu department pakhat maiin a thawh chi a nih loh avangin department hrang hrang nen inberema inkaihhruaina mumal tak zuia thawh thin a nih thu a sawi bawk.