Aizawl khawpui chawmtu Tlawng lui-ah tui a tlem chhoh zel avangin PHE department-in nikhata tui a pump chhuah theih a tlem hret hret a, mipui tana tui sem chhuah zat pawh a tlakhniam chhoh mek avangin PHE deptt. chuan mipuite tui ren turin an ngen.
Tlawng lui kam zel chungchangah hian PHE department chuan thuchhuah siamin, Tlawng lui chu a ni tela a kam zel avangin nikhata tui an pum chhuah thin chu a tla hniam zel a, nikhata litre maktaduai 30 pump thinin, litre maktaduai 24 chauh an pump theih hnu ah pawh tlahniam zelin litre maktaduai 20-ah a tlak thlak leh a ngai tawh dawn niin an sawi.
Ruah a sur lohva lui tui chu a kam zel a nih chuan tui pump chhuah theih zat tur chu nasa taka tlahniam tura ngaih a nih thu PHE deptt. thuchhuah chuan a tarlang a. Tui sem chhuah zat pawh a tlahniam nghal lo thei lo tih sawiin, Aizawl mipuite chu a theih anga tui renchem turin an ngen a ni.
Tarlan tawh thin angin, kuminah hian thal a na a, ruah tui a tlak mumallohna a rei tawh avangin PHE departmeht-in tui an lakna Tlawng lui-ah tui a tlem hle a. May ni 9, 2023 khan Tlawng luiah tui MLD 39.9 a awm a, kumdang thal laia tui awm zat nen khaikhinin a tlem hle. May thla chanve a thlen chhoh hnuah phei chuan Tlawnga tui awm zat chu a tlem zual tawh hle niin PHE deptt. chuan an sawi bawk.