Aizawl: MNF Adviser R Lalzirliana’n Manipur-a buaina awm mekah Manipur sorkar leh official-te demawm a tih thu sawiin, “Manipur Zofate khi Meitei rama awm an ni lo va, hmakhawsang atanga an lo awm tawhna a ni zawk a, kan humhim tlat a ngai a ni,” a ti.
Tawi East block MNF media & political training, Keifang YMA Zawlbuka neihah he thu hi nimin khan R Lalzirliana chuan a sawi a. “Ram leh hnam chhan kawngah kan huai tur a ni a, kan huai ngam lo a nih chuan kan dik tawk lo tihna a ni,” tiin, “Kan dik chuan tanpuitu kan nei mai zel,” a ti.
R Lalzirliana chuan, “Politics-ah chuan mahni inhmuh dan aiin mi dang min hmuh dan a pawimawh,” a ti a. “Party leh pawl hrang hranga atanga kalkhawm ZPM hi an inrelbawl dan a mumal lo hle a, an chief ministerial candidate ber pawh party-a a dinhmun a chiang lo,” tiin, “Party president a nih laiin bân a tawk tawh a, MP a nih laiin bân a ni tawh bawk,” a ti.
ZPM chu an insawi dan angin an awm lo zel niin R Lalzirliana chuan a sawi bawk.