Aizawl: Mizoram Congress party-a treasurer a bân tak avanga hmun ruak chu a luahtu tur tihfel a ni ta a, MPCC treasurer thar atan hian Congress thalai president ni lai, Dr Lalmalsawma Nghaka ruat a ni.
MPCC General Secretary John Siamkunga chuan nimin khan treasurer thar ruatna lehkha hi a pe chhuak a, appointment order-ah hian, “MPCC President Lalsawta’n MPCC danpui Article IX section 3-in a sawi ang leh May 3, 2023-a MPCC Executive Committee-in pawmpuina a pek angin Dr Lalmalsawma Nghaka chu MPCC treasurer atan ruat a ni,” tiin tar lan a ni a, a term hun chhung chu tuna MPCC OB term ding lai ang a ni.
Congress thalai president ni lai, party puia treasurer atana ruat a nih takah hian MPCC President Lalsawta chuan MPYCC president thar tur pawh a ruat nghal a, MPYCC vice president ni lai, Laltawnliana, Zarkawt chu president atan ruat a ni.
Tar lan tawh thin angin MPCC Treasurer Zodintluanga Ralte chuan April 21, 2023 khan treasurer a nihna atanga bânna a theh lut a, May 3-a MPCC Executive Committee chuan a bânna chu pawmsakin treasurer thar ruat a ni ta a ni.