MNF Adviser, MNF Media and Publicity Board Vice Chairman ni bawk J Malsawmzuala’n ZPM party chu dinna nghet nei lo party a puhin, “a thli beng zawng nia an hriat apiang an bawh mai” a ti.
MNF Tawi East block media & political tranning-ah he thu hi nimin khan MNF Adviser J Malsawmzuala chuan a sawi a. ZPM chuan thalai rilru la thianghlimte hip khawm thei tur nia an hriat apiang an bawh nia sawiin, “Mizote hi hnam tlem te, vemhim la ngai em em kan nihna pawh an hre chang tawh lo. Nupui pasal neih kawngah pawh an thik thu an ti chhe ngam tawh lo a, hnam rilru an put loh zia chu a lang chho zel” a ti.
J Malsawmzuala chuan ZPM leader Lalduhoma chu duhthusam ram, a taka thleng thei lo tur leh an tih theih miah loh tur tam tak sawih puhin, “party sorkar ni lo mipui sorkar an sawi bawk a, ruling party mi nih kher a ngai lo, angkhatin kan en vek ang tiin, neutral leh thalai rilru thianghlimte hip an tum a, party mi ten malsawmna an lo chan hmasak thin te pawh mipui rahbehna leh salbehna a ni, an ti a, kan Pathian thu pawhin, ‘Lo neitu thawkrim chu a rah chang hmasatu a ni tur a ni’ a ti a, party worker thawkrim ten a rah an lo chan hmasak hi thil sual a ni hauh si lo” a ti bawk.
“Pu Duhoma hian thil ropui tak tak te sawi thin mahse, tuna an khawih chin, MLA fund an hman danah te pawh dan hrulah rem leh rem lova her remin an party mite leh an unit te duhsakna atan an hmang ve leh nghal tho si” J Malsawmzuala chuan a ti a. “Thalai tam tak an tih beidawn mek te leh an la tih beidawn zel tur te lo er let leh tur thlir lawk hian kan ram leh hnam tana pawi an khawih thui hmain an rilru put hmang mipui ten kan hriat chian a ngai” a ti bawk a ni.