Dan pangngaiah chuan June 1-ah furpui tia sawi mai thin, monsoon chuan Kerala thlenga ruah sur tan tura ngaih a ni a; mahse, kuminah hian ni 4 velin a tlai dawn a, June 5-ah fur ruahtui hmasa ber chu India-ah a sur tan dawn niin khawchin zirtu, Indian Meteorological Department chuan a sawi.
“Kumina fur ruahtui tla hmasa ber hi Kerala-ah June 5-ah lo thleng tura ngaih a ni a, dan pangngai aiin ni 4-in a tlai dawn,” tiin IMD chuan nimin khan an sawi.
Chhimthlang lam atanga rawn kal thin, monsoon ruah hi Kerala-ah June 1-ah sur tanin zawi zawiin ram pum a tuam chhuak thin a. Kumin anga tlai hret hun hi a nei fo tawh a, nikum pawh khan ni 7 laiin Kerala a thleng tlai.
Fur ruahtuiin Kerala a thlen hun hian India ram pumah nghawng a nei thin a. A dawn tlai emaw, a hma hret emaw chuan ram pumah a tlaiin a hma ve zel thin a. Nipui leh thal thlengin a nghawng tihna a ni.
Kuminah hian tlai hret dawn angin lang mah se India hian ruahtui pangngai (normal) a dawng dawn nia hmuhlawk a ni thung a. June-ah hian ni dang aia tlem deuh sur tura rin a ni a, July-ah pawh ruahtui hi a la tam vak lo ang a; mahse, nikum ang bawkin August leh September-ah a tam dawn thung niin an sawi.
India rama khawchin zirtu, IMD hian April 15 daih tawhah khan kuminah hian fur ruahtui pangngai tak, 96-104% a dawn a rinawm thu a sawi a. A danglam hret a nih pawhin June leh September thla chhung hian 5% lekin a tamin emaw, a tlem dawn niin an ngai a. Kum 1961 leh 2010 inkara thla li chhunga ruahtui tlak dan chhinchhiahah kum tin 88cm vel sur thin ang a ni.
IMD hian kum 2005 atang khan fur ruahtuiin Kerala a thlen hun tur hi a lo sawi lawk tawh thin a. Ni 4 vela sawi lawk dik loh zeuh chang nei mah se a dik thawkhata ngaih a ni.