Mizoram Cooperative Society Tangrual Pawl (MCSTP) hruaituten nimin khan Aizawl Press Club-ah chanchinbumite an kawm a, society hruaitua zawna kum 10 aia rei hruaitu nih theih lohna dan chu sorkarin a paihsak ngei an beisei tih an sawi.
MCSTP hruaitute chuan, “Society hruaitu kum 10 aia rei niten hruaitu nihna an chuh theih tawh loh chuan kan buai nak dawn a, society thenkhat chu a kal mumal thei lo ang,” an ti a, he dan hi paih turin chief minister an ngen tawh thu te, Ningania council of minister thutkhawmah sawiho ngei thei se, dan hi paihsak ngei thei se an duh a, sorkar hotute pawh an duhna tihhlawhtlinsak ngei turin an ngen ngawl hle tih an sawi.
MCSTP hruaitute zinga mi, Apex Bank Chairman T Lalmuanpuii chuan tun hnaia press conference a neiha society zawng zawngin he dan hi paih duhin an lo hnawl tawh tih a sawi chu Mizoram Cooperative Society Siam Tha Pawl (MCSP) intiten thu dik lo tia thuchhuah an siam hnan chu pawi a tih thu sawiin, hemi chungchangah hian MCSP-te chu legal notice an pe a, nimin khan dawta an puhnaah MCSP hian ngaihdam dilna thuchhuah an siam leh ta tih a sawi bakah a ngaihdam thu a sawi.
MCSTP hruaitute chuan cooperative society hmangin thil man to lutukte tihziaawm an tum a, vawka Mizoram a intodelh theih nante theihtawp chhuah an tum thu a sawi a, hemi kawngah hian tangruala ram tan theihtawp chhuah ho zel a tul thu an sawi a ni.