- Ruata
Korean lirthei company changkang leh hlun tak Kia lirthei lar tak pahnih Seltos leh Sonet te chu hmel thar nen facelift model a rawn chhuak hnai leh ta a, midsize SUV hralh kal Seltos hi chhuak hmasa tura beisei a ni a, hemi zawhah hian an sub 4 meter SUV hralh kal tak tho, Sonet chu a rawn chhuak ve dawn a ni.
Korea company lar Kia hian kum 2019 khan India market-ah Seltos midsize SUV hi a lo tlangzarh tawh a, heng SUV chi thar lo chhuak tur hian design leh a chhung lamah pawh inthlak danglamna kan hmu nual dawn a, a khawl lamah pawh a chi thar kan hmu dawn a ni. Seltos chauh ni lovin Kia hian Sonet sub-4 meter SUV updated version chu ram chhungah a tlangzarh dawn bawk a. SUV pahnih hi kumin financial year tawp hmain tlangzarh an ni dawn a ni.
Kia Seltos Facelift thar – July/August 2023-ah? Eng nge kan hmuh dawn?
Kia Seltos hi kum 2022 laihawl aṭang khan international market eng emaw zatah hralh chhuah a ni tawh a ni. Model thar hi kumin June emaw July emaw chhung hian India ram market-ah tlangzarh theih beisei a ni a. Design-ah danglamna hrang hrang kan hmu ang a, hei hi khawvel hmundanga an hralhchhuah ang model nen a inang dawn a ni. Kia Seltos thar tur hian hian Kia Tiger Nose grille thar, bumper thar leh headlamp setup style thar a nei dawn a, LED daytime running lamp , a grille nena inzawm a nei dawn bawk a ni. A lirthei hnung bawrah pawh design inthlak eng emaw zat a awm dawn a, tailgate siamṭhat a ni bawk a. LED tail-lamp thar a rawn keng tel ang a, light bar hmanga inzawm a ni dawn a ni. He SUV hian tailgate design thar leh dual-tone bumper faux silver insert te a nei dawn a ni.
A lirthei chhung lamah hian Kia Seltos facelift thar hi a dashboard bawr design thar leh center console update thar nen kan hmu dawn a. Connected, twin-screen layout thar nen kan hmu ang a, he screen thar pahnih hi pakhat chu 10.25-inch touchscreen infotainment screen a ni ang a, pakhat hi digital instrument console a ni dawn bawk a ni. Panoramic sunroof a nei dawn bawk a, hei hi a elpui Hyundai Creta-ah te chuan a awm tawh a, tuna chhuak mek Kia Seltos-ah hian a la awm ve lo a ni. Kia Seltos lo chhuak thar turah hian ADAS tech a awm dawn bawk a, hemi hnuaiah hian autonomous emergency braking, adaptive cruise control, blind spot monitoring, lane assist leh a dangte kan hmu dawn a. A khawl lamah chuan he SUV hian 1.5L Naturally Aspiated petrol leh 1.5L turbo diesel engine awmsa chu a rawn la ring ang a. Seltos tharah hian 1.5-litre 4-cylinder turbocharged petrol engine thar kan hmu thung dawn a, hei hian 160bhp power leh 253Nm torque a pe chhuak ang.
Kia Sonet thar kumtawp lamah beisei, eng nge kan hmuh dawn?
Kia hian March 2021 khan Sonet sub-4 meter SUV hi a lo tlangzarh tawh a, an segment-a SUV hralh chhuah tam ber pawl a ni. Kia Sonet thar hi December 2023-ah tlangzarh a ni dawn niin an sawi a, Kia Sonet facelift thar hi India kawngpuiah vawi hnih khat an enchhin lai hmuh a ni tawh bawk. A enchhinna lirthei te hi te chu nasa takin thup an ni a, he SUV tharah hian a hma leh hnung lamah design thar deuh hlak kan hmu dawn a. A design lamah chuan Seltos facelift thar lo awm tur nen hian a inang hle a ni.
A chhunglamah pawh hian hmanraw changkang leh tha ber ber hmanga inthlak danglamna kan hmu dawn a. He SUV hian 10.25-inch touchscreen infotainment system a neih hmel a, interface ṭha zawk leh connected car technology te a nei dawn a ni. A khawl lamah chuan kan hmuh mek sa, 1.2-litre petrol, 1.0-litre turbo-petrol leh 1.5-litre diesel khawl te a hman chhunzawm dawn a ni.