India-a parliament building thar tur chu tun thla tawpah hian Prime Minister Narendra Modi-a’n a hawng mai thei nia sawi a ni.
Parliament thar hi sak zawh tep a ni tawh a, prime minister hian May chawlhkar hnuhnung berah hian a sorkar kum kuana lawm nan a hawng dawn nia sawi a ni.
Prime Minister Modi-a hi kum kua liam ta, May 26, 2014 khan rinawmna thu tiamtira lak luh a ni.
Chhawng lia sak in hi Rs. Vaibelchhe 970 senna niin MP 1,224 lenna tur a ni a. Constitution Hall lian tak, India-a mipui rorelna kaihhnawih thil pho lanna tur bakah zanriah eina leh lirthei hunna zau tak a awm dawn bawk.
Rorelna in hniha thawktute chuan uniform hran, a thar an nei dawn a, National Institute of Fashion Technology (NIFT)-in an duan tur a ni.
Building thar hian luhka lian pathum – Gyan Dwar, Shakti Dwar leh Karma Dwar a nei dawn a, MP, VIP leh tlawhtu pangngaite luhna a hran vek ang.
Parliament building sakna tur lung hi Modi-a hian December, 2020 khan a lo phum tawh a ni.
Modi-a sorkar kum kuana pual hian BJP chuan thla khat awh tur ram puma ‘special contact campaign’ huaihawt a tum a, Lok Sabha bial tin tuam chhuah an tum.
Modi-a hian he campaign hi May 30-ah a hawng dawn niin BJP chuan an sawi a. A tukah prime minister hian rally lian tham tak a nei leh ang a. Campaign chhungin BJP hruaitu lawkten vawi 51 zet rally an nei ang.
Lok Sabha bial 396 -ah vantlang inkhawm neih tum a ni bawk.
BJP chief minister, state-a eptu leader, MP leh MLA-te chu heng rally leh vantlang inkhawma tel tur hian sawm an ni hlawm.