New Zealand prime minister chuan an rama hostel-a kangmei chhuakah mi paruk vek an thi a, eng emaw zat an dinhmun la hriat loh an awm tih tual chhung chanchinbute hnenah a sawi.
Emergency service-te chu Wellington-a Loafers Lodge hostel-ah hian Thawhlehni zing khaw var hma (India-a tlai dar 6:00) pelhah koh an ni.
Mi 50 chuang chhanchhuah an ni a, police chuan mi 11 lai an chin an la hre lo tih a sawi.
Prime Minister Chris Hipkins chuan thi zat hi an la pung thei tih a sawi.
Police chuan building chhung an luha an dap kim hma loh chu thi zat chiang tak hriat a har tih an sawi ve bawk.
Kangmei chhuah chhan tak hi hriat a la ni lo va. Fire & Emergency New Zealand (FENZ) chuan tihluih a ang niin an sawi a; mahse, police chuan ‘hal luih’ tia sawi mai theih a la ni lo niin an sawi thung tih New Zealand Herald chanchinbu chuan a tar lang.
Kang thelhtuten building kang hi an thlen chuan a chung lam a lo kang nasa hle a. Zing dar 4:00 velah kang thelhna 20 hmangin an thelh mit thei chauh a ni.
Tual chhung chanchinbute chuan tui phuhna (sprinkler) chu a hman tlak loh niin an sawi a, fire alarm pawh a tha lo tih an sawi a; mahse, finfiahna a awm lo.
FENZ district commander Nick Pyatt chuan Wellington khawpui tan ‘mangchhia’ niin a sawi.
Pyatt chuan building chhungah hian asbesto a awm avangin a khu an hip luh loh nan khawtual mite chu hmai tuam tur leh an tukverhte pawh khar turin a ngen tih New Zealand Herald chuan a tar lang.
“A tute tan pawh a lungchhiatthlak a. Nunna chân chhungte ka tawrhpui tak zet a ni,” a ti.