India khawthlang lam, Maharashtra-a chi leh chi intihbuaina thlengah mi 100 chuang man an ni a, mi pakhat thiin mi dang pariatin hliam an tuar bawk.
Tharum thawhna hi Akola khawpuia thleng niin social media-a film sawi hlawh tak, The Kerala Story chungchang tar lan atanga intan nia sawi a ni.
Thuneituten internet service an titawp lailawk a, boruak thunun nan curfew puan a ni bawk.
Hliam tuar zingah hian constable hmeichhia pawh a tel.
Police chuan buaina hi Inrinni atanga intan kha niin an sawi a, social media-a film chungchang tar lan duh lohna chu hnam pakhatin Akola-a police station tuala an lantir atanga tan niin an sawi.
Heng lai vela cheng mi pahnih, an sakhua an let lai thlalak screenshot chu mi pakhatin Instagram-ah a tar lang a. Police thuneitu pakhat chuan The Indian Express chanchinbu hnenah he thlalak sawi zuia inbiaknaah ‘sakhaw thila pawi insawisakna’ a thleng zui ta niin a sawi a, a kimchang tak erawh hriat a ni rih lo.
Maharashtra Chief Minister Eknath Shinde-a office chuan mipuite chu buaina siam zawnga che lo turin a ngen a, police-te pawh tharum thawhna thlenga inhnamhnawihte lakah na taka che zel turin a ti bawk.
The Kerala Story hi kar hmasa khan theatre-ah chhuah tan a ni a, a hma atang tawhin sawi a hlawh hle a. Film-ah hian India chhim lama Indian hmeichhiaten Islamic State pawl an zawm dan vel tihlan a ni.
Eptu politician-te chuan nasa taka sawiselin eng emaw thehlar tumna niin an sawi a, a siamtute chuan uluk taka zir chiang leh thil thleng tak tak behchhana an siam a nih thu an sawi thung.
Rorel lai, BJP hruaitu tam takte chuan an fak thung a, heng zingah hian union minister pahnih pawh telin Prime Minister Narendra Modi pawhin tun thlaa a campaign-naah pawh a fak a ni.