Assam-a police officer-te chu an rihna paih tura tih an ni a, an paih lo a nih chuan an hna bansan tura tih an ni bawk.
State police hotu lian chuan officer zawng zawng-te body mass index (BMI) chu August thla laihawl atangin ‘professional taka chhinchhiah vek’ a ni dawn tih a sawi.
Officer zingah ‘thau lutuk’ huanga awmte chu November thla thleng hun pek an ni ang a, chutah pawh an la zâng lo a nih fo chuan voluntary-a chawlhtir an ni ang.
Hrisel lohna avanga ngaihhnathiam ngai erawh an awm dawn tih Assam Director General of Police GP Singh chuan a sawi.
Singh-a chuan police-te BMI record hmasa ber an ni dawn tih Twitter-ah a tar lang.
Chawlhkar tam vak lo liam taah khan chief minister chuan police 300 vel chu ‘zu an in nasat lutuk’ avang leh ‘an taksa a fit loh’ avangin an hna atangin a hun hmaa chawlhtir an ngai tih a lo sawi tawh.
Hetianga a hun hmaa chawlhtir hi ‘police zingah nun dan phung lo taka nung tihtawpna tur’ a nih thu a sawi bawk.
Zirchiannaah chuan Indian police officer-te hi hna an thawh chhung a rei a, hunbi a mumal lo va, chawlh leh ei leh inna hun thawl tha pawh an nei mumal lo hle tih hmuh a ni.
Kum 2018 khan Karnataka-a reserve police officer-te chu an rihna paih tura tih niin an paih loh a nih chuan hrem (suspend) tura tih an ni a. Hemi tum hian an hotu sang pakhat chuan hetiang an kalpui chhan hi a hma thla 18 chhungin officer zingah ‘nun dan phung dik lovin a ken tel natna’ chi hrang hrang – thawkna tha lo leh zunthlun avanga thi an tam vang niin a sawi.
BMI an tih hi mihring san zawng leh rihna inmil tawk chhinchhiahna a ni a, khawvel pumah doctor, health service provider leh insurer-ten mihring hriselna endikkna atana an hman lar niin thau lutuk te, rit lutuk te an enna ber a ni.
Hetih rual hian BMI hmanga mihring hriselna dinhmun teh hi sawihnawm a ni ve fo va, a chhinchhiahna ringa inteh ngawt chu a dik tawk lo va, a scientific lo va, a hmangtu tur hi mingo, a bikin European mipa an ni bawk a, Indian tana intehna tur a ni ve lo nia sawi a awm.