Cyclone na takin Pathiannia Myanmar a nuai avanga thi chu mi 40 vel an nih tawh thu tual chhung miten BBC an hrilh a, thi zat hi la pung thei a nih thu an sawi bawk.
Cyclone Mocha hi tun kum zabia helai bawr nuaitu thawk tawhah chuan a na ber pakhat niin darkar khata km 209 zeta chak thlipui a keng.
Thi tam ber hi Myanmar lailia Rakhine state-ah niin Sagaing leh Magway region-ah te an awm nual bawk.
Sipai sorkar chuan thi zat hi 21 niin a puang thung.
Finfiah chiah lohte telh an la nih loh avangin thi zat hi hei aiin a la sang thei a, a bik takin Rohingya mi, chenna mumal nei lova camp-a awm khawmte zingah a chiang lo zual a. Camp-a thite hi kum 2021-a mipui sorkar paih thlaa rorelna chelhtu sipaite hian an chhiar tel duh lo nia sawi a awm bawk.
Chenna in za tel a chhia a. Inbiakpawhna pawh a chhe nasa a, mi eng emaw zat chin hriat loh an la awm a, thi hi an pun a rinawm hle.
Rakhine state khawpui, Sittwe-ah chuan hmun hniam leh vaukamah mi tam tak an cheng a, thing tlu leh electric ban tluin kawng a tiping nasa hle.
Cyclone a thawh hnu lawkah hian hmun thenkhatah sipaiten tual chhung mite an bei nia sawi a awm bawk.
Hmarthlang lama Sagaing region-ah chuan cyclone-in a nuai mek laiin an khuaah sipaite an luh avangin mi tam tak an tlanchhia.
“May 12 atangin ruah a tla tawh a, tuiin min chim atangin kan tlanchhia,” tiin Kani khuaa cheng pakhat chuan BBC hnenah a sawi a. “Sipai an lo kal bawk si a, mi chengte hian cyclone aiin sipaite kan hlau zawk a ni,” a ti.
Tual chhung mite chuan Kani leh Khin Oo khuaa chengte chuan ni hnih liam ta chhungin sipai beihna an tuar a, mi 15,000 vel an tlanchhia niin an sawi a. Inpa khuaa mipa naupang kum li mi chuan silaimu a tawn fuh avangin damdawi ina enkawl a ngai niin an sawi bawk.
Cyclone-in a nuai, Rakhine-a bu khuar, NGO Partners Relief & Development chuan, “Myanmar hian kil hrang hrang atangin an tuar a, Cyclone Mocha-in Rakhine a nuai nat em em laiin hmun thenkhatah sipaite an lo che bawk a. Puih an ngaihna hi a zual hle a ni,” tiin Thawhlehni khan Twitter-ah an tar lang.
Sagaing-a cheng tam tak hi sipaite dotu an ni a. Sipaite do tura sipai pawl indin, People’s Defence Force-a tel pawh chhungkaw tam takah an awm a ni.
Cyclone hi Atlantic tuipuia insiam thin, hurricane leh Pacific tuipuia insiam thin, typhoon te nen inang reng niin sawi dan hrang a ni a, Indian Ocean-a insiam thin a ni ve thung a. Hetiang hi scientist-te chuan sik leh sa inthlak nasa avangin a na telh telh a, insiam pawh a tam telh telh niin an sawi.