Health Minister Dr R Lalthangliana chuan certificate tha tak tak nei chhawr tlak loh buaipui ngai tam tak an awm avangin Mizoram zirna hi ngaihtuah chian a tul thu a sawi.
Thawhlehni khan a pisa-ah Lalhruaitluanga lehkhabu ziah ‘Zirna Lamtluang (Road Map to Higher Education)’ a tlang zarhnaah Dr R Lalthangliana hian, “Mizorama zirna hi a chhia a ni hran lo a, certificate tha tak tak nei chhawr tlak loh buaipui ngai tam tak an awm thung. Chuvangin Mizoram zirna hi ngaihtuah chian a ngai,” a ti.
Dr R Lalthangliana chuan kum zabi 21-ah a hminga ti ve mai mai tan hna a hmuh theih tawh loh tih sawiin, “Hlawhtlinna chang tur chuan tih tak takna nen, a thiam fal nih a ngai zel tawh a ni,” tiin, tun tum HSLC result chhuaka hlawhtlinna changte thlen chin tur a ngaihtuah nasat thu a sawi.
Health Minister hian thil tak tak ti turin mihring lamah Mizote hi an tlem avangin tan lak nasat a tul tih a sawi a. ZMC-ah professor tur pawh an inhmu zo mang lo a, ram pawna mi pitar putar hmai chuar tawh cheng nuai hnih leh singnga hlawh tura an thlem thu sawiin, “A hahthlak hle a. Super speciality lamah Mizote kan tlachham lutuk a, tih takzeta tan lak zel kan ngai a ni,” a ti.