AZL: MZP President Lalnunmawia Pautu-in MLA inthlana hnam dang nupui/pasal neite candidate-a dah lo tur leh hnam dang minister-a dah lo tura an ngenna ngai pawimawh turin political party hrang hrang a ngen nawn.
HSLC exam-a top 10-a Mizo zirlai tlingte nimina Vanapa Hall, Aizawla MZP-in an chawimawinaah he thu hi a sawi a. Political party hrang hrangte an ngenna chungchang hian tun hnaiah sawi a hlawh thar hle nia sawiin, “Hman atanga tun thlengin MZP dinna chu a la ngai reng,” a ti.
MZP president chuan, “He ngenna hian ngaih pawimawh a hlawh lo a nih chuan kan hnam kal zel turah hnam dang nupui pasal neih pawi tih lohna kan nei ang tih kan hlau a ni,” a ti bawk.
Manipur buaina chungchang pawh sawiin, MZP president chuan MZP-in Manipur-a Zofate thlavang an hauhnaah sawisel an hlawh nasa hle niin a sawi a. “Manipur buaina hi MZP thuchhuah avanga lo thleng ni lovin, ruahman lawk a ni,” a ti a. “MZP chuan kan unaute harsatna tawh hi a harsatnaah a ngai a, a tawp thlengin an tan a ding zel dawn,” a ti bawk a ni.