Congress hruaitu, Rahul Gandhi chuan Nilaini khan tun hnaia assembly inthlana hnehna an channa, Karnataka-a chief minister nihna chang tura rinkai pahnih, Siddaramaiah leh DK Shivakumar chu a kawm ve ve a. Hetih lai hian chanvo sang chelhtu tur hi hriat theih a la ni lo zel.
Hruaitu lawk pahnih inkara chanvo inchuhna awm mek karah hian a kum upa zawk, Siddaramaiah tantute chuan Gandhi-a nena an inkawm zawhah hian a chief minister ngei dawn nia ngaiin a lawmna an tan tawh thung a. Hetih lai hian Inrinnia inthlan result a chhuah hnuah pawh tu nge chief minister tur tih puan chianna a la awm lo zel thung.
Congress hruaitu hlun, Randeep Singh Surjewala chuan thutlukna siam nan darkar 48 a la ngaih thu leh a bak darkar 24 chhungin cabinet tihfel tur a nih thu a sawi.
Thenkhat chuan party hian kum 75 mi, Siddaramaiah chu MLA tam zawkin an duh avangin chanvo sang hi an chelhtir dawn niin an sawi a. Heti a nih chuan kum 61 mi, Shivakumar-a chu eng dinhmunah nge a awm dawn tih zawhna a awm nghal.
Gandhi-a nen an inkawmnaah hian Shivakumar hian Siddaramaiah nena an inkarah harsatna a awm lo tih a sawi niin an sawi a. A hnuah Congress chief Mallikarjun Kharge a hmu leh bawk.
Siddaramaiah hi Thawhtanni atang khan Delhi-ah a cham tawh a, chanvo sang ber chelh tura rinkai a nih karah party hruaitu lawk tak takte a kawm kual a. Chief minister a ni dawn em tih zawhna chu, “Nghak ila kan hre mai ang, tunah chuan ka hre lo,” a ti.
Shivakumar-a hian chanvo sang chu a chang lo a nih pawhin hel lam a rilru-ah a awm lo tih a sawi a. “Party-in an duh chuan mawhphurhna min pe thei, keini chu kan inpumkhat a. Tumah then darh ka duh lo va, min duh emaw, duh lo emaw, mawhphurhna la mai thin ka ni,” a ti.
Congress hian chief minister an dah hi nakuma ram pum inthlan nghawng thei a nih avangin an fimkhur hle a, result a chhuah rual khan MLA-te duh dan ngaithla turin observer a tir nghal a ni.
May 10-a vote thlakah khan Congress hian bial 224 awmah bial 135 an la a, party malin sorkarna an siam thei a ni.