Aizawl: Serchhip bukpui leh Chhiahtlang Chhim Veng inkar kawngthlanga ruang chhar, Lalsangzuala thattu ni ngeia rin, Laldinthara (42), Khawruhlian Vengchung chu nimin khan police-in an man.
Police hotute hnen atanga thudawn danin, Lalsangzuala thattua rinhlelh, Laldinthara chu nimin chawhnu khan man a ni a, mi dang rinhlelh man erawh an la awm lo thung a ni.
Hetihlai hian he tualthihna thleng chungchangah hian nimin lam khan tualthattu nia ngaih hnam dang mi pahnih man an nih thu, an thlalak nen social media-ah thehdarh a ni a, he hi thu dik lo niin heng thil vawrh darhtute hi cyber crime police-in an chhui mek nia thudawn a ni.
Tar lan tawh thin angin Lalsangzuala, Mission Vengthlang ruang hi nimin zing khan Chhiahtlang atanga Serchhip lam, Chhiahtlang Chhim veng leh Bukpui inkar kawng thlang feet 60 velah chhar a ni a, a ruang an chharnaa hnuhma awm leh a taksaa hliam a neih dan atangin mi kut tuara thu ni ngeia rin a ni.